Тоқаев: Менің мақсатым – халқыма мейлінше еркіндік беру

Опубликовано:

Қасым-Жомарт Тоқаев
Қасым-Жомарт Тоқаев. Фото: Ақорда

Мемлекет басшысы Түркия астанасы Анкарадағы жиында яғни, іскерлік топтар алында сөйлеген сөзінде Жаңа Қазақстанды құруға кіріскенін айтып, саяси жүйені толық жаңғыртатынын жеткізді. Бұл туралы KAZ.NUR.KZ Ақордаға сілтеме жасап хабарлайды.

Өз сөзінде Қасым-Жомарт Тоқаев Қазақстан "Суперпрезиденттік" басқарудан мықты парламенті бар президенттік республика жүйесіне біртіндеп өтетінін атап өтті.

"Бесінші маусымда жалпыхалықтық референдум өткізілетін болды. Конституциямыздың 33 бабына түзетулер енгізіледі. Менің мақсатым – халқыма мейлінше еркіндік беру, демократия мен заң үстемдігін күшейту. Президент ретінде ешқандай артықшылықтар мен жеңілдіктерге құмар емеспін. Мұндайды қаламаймын", - дейді мемлекет басшысы.

Сонымен бірге президент ұлттық экономика түбегейлі жаңғыртылатынын жеткізді.  

"Оны әділ бәсеке орнату, жекеменшікті қорғау, монополиядан арылту арқылы жүзеге асырамыз. Осының бәрі еліміздегі саяси тұрақтылықты нығайта түседі. Сонымен қатар бизнестің мүддесі мен құқын қорғауға ықпал етеді. Ең бастысы, шетелдік инвесторлар үшін экономикалық мүмкіндіктерді барынша кеңейтеді. Бір сөзбен айтқанда, алдымыздан ынтымақтастықтың жаңа көкжиегі ашылады. Бұл Түркияның ірі холдингтеріне, компанияларына ғана емес, шағын және орта бизнес өкілдеріне де мүмкіндік береді", - дейді Қасым-Жомарт Тоқаев.  

Еске сала кетейік, президент 10 мамыр күні Түркия Республикасына мемлекеттік сапармен барған еді.

Мақаланың түпнұсқасы: https://kaz.nur.kz/politics/1968806-toqaev-menin-maqsatym-xalqyma-meilinse-erkindik-beru/