Дохадағы форум аясында Тоқаев Грузияның премьер-министрімен өзекті мәселелерді талқылады (видео)

Опубликовано:

Тоқаев Ираклий Гарибашвилимен кездесу өткізуде
Қасым-Жомарт Тоқаев Ираклий Гарибашвилимен кездесу өткізуде. Фото: Ақорда

Мемлекет басшысы Қасым-Жомарт Тоқаев Қатар экономикалық форумы аясында Грузияның премьер-министрі Ираклий Гарибашвилимен кездесу өткізді, деп хабарлайды Ақорда.

Президенттің баспасөз қызметінің мәліметінше, кездесуде екіжақты ықпалдастықтың өзекті мәселелері талқыланған.

"Сіздің назарыңызды мынадай бағыттардағы ынтымақтастықты дамыту перспективаларына аударғым келеді. Атап айтқанда, өзара сауда көлемін ұлғайту. Менің ойымша, біз өнімдерді өзара жеткізуді арттыра аламыз. Қазақстанға және Орталық Азияның басқа да елдеріне тауар жеткізу жағынан Грузияның үлкен қоры бар. Осы бағытта тығыз жұмыс істеуге дайынбыз", – дейді Қасым-Жомарт Тоқаев.    

Сондай-ақ мемлекет басшысы көлік-логистика саласында, атап айтқанда Қазақстанның Ақтау және Құрық айлақтарының, сонымен қатар Батуми теңіз айлағының әлеуетін пайдалана отырып, екі ел арасындағы жүк тасымалын бірлесіп жүзеге асырудың маңызды екенін атап өтті.

Өз кезегінде Ираклий Гарибашвили Дохада кездесуге уақыт бөлгені үшін Қасым-Жомарт Тоқаевқа алғыс білдіріп, Грузияның Қазақстанмен арадағы көпжақты әрі өзара тиімді ынтымақтастықты одан әрі дамытуға әзір екенін растады.

Грузия премьер-министрі келесі айдың аяғында Қазақстанға келуді жоспарлап отыр.

Мақаланың түпнұсқасы: https://kaz.nur.kz/politics/1975079-doxadagy-forum-ayasynda-toqaev-gruziyanyn-premer-ministrimen-ozekti-maseleleri-talqylady/

jitsu gif