Тоқаев Пәкістан президентіне көңіл айту жеделхатын жолдады

Мемлекет басшысы Пәкістан президентіне көңіл айту жеделхатын жолдады, деп хабарлайды Ақорда.

Жеделхатта Қасым-Жомарт Тоқаев Пәкістандағы адамдардың қазасы мен көпшіліктің зардап шегуіне әкелген жойқын су тасқыны туралы хабарды қатты қайғыра қабылдағанын жеткізген.

Сондай-ақ мемлекет басшысы Пәкістан президенті Ариф Альвиге және жақындарынан айырылған отбасыларына көңіл айтып, қайғысына ортақтасып, осы қиын кезеңде Пәкістан халқы және үкіметімен бірге екенін білдірген.

Хабар24-тің хабарлауынша, Пәкістан халқы маусымнан бері толассыз жауған жаңбырдың салдарынан болған су тасқынының зардабын тартуда.

Су тасқынынан 3 ай ішінде бір мыңнан аса адам көз жұмған. Арасында бала көп. Елде төтенше жағдай жарияланған. Сонымен қатар Пәкістан билігі өзге мемлекеттер мен халықаралық ұйымдардан қолдан келгенше көмек көрсетуін сұрап отыр.