Тергеуге түскен Ғалымжан Ниязов Маңғыстауда жаңа қызметке тағайындалды

Опубликовано:

Ғалымжан Ниязов Маңғыстау ауданының әкімі болып сайланды
Ғалымжан Ниязов. Фото: Маңғыстау облысы әкімдігі/Facebook парақшасы

Маңғыстау облысының әкімінің орынбасары Ғалымжан Ниязов жаңа қызметке тағайындалды. Оның кандидатурасы президенті әкімшілігімен келісілді, деп хабарлайды өңір әкімдігінің ресми Facebook парақшасына сілтеме жасаған KAZ.NUR.KZ.

Бүгін, 16 қыркүйекте Маңғыстау облысының әкімі Нұрлан Ноғаев Маңғыстау ауданының жаңа әкімін таныстырды.

Ғалымжан Ниязов Қ.Сәтпаев атындағы Қазақ ұлттық политехникалық университетін "Полиграфиялық машиналар және автоматтандырылған кешендер" мамандығы бойынша, сондай-ақ Ш.Есенов атындағы Ақтау мемлекеттік университетін "Өнеркәсіптік, азаматтық құрылыс және қала шаруашылығы" мамандығы бойынша бітірген.

  • Еңбек жолын 1990 жылы Шевченко қаласының АТП-1-де бастаған.
  • 1991 жылдан 2002 жылға дейін мұнай және құрылыс саласындағы бірқатар коммерциялық ұйымдарды басқарды.
  • 2002-2006 жылдары "Құрылысконсалтинг "Ұлттық орталығы" АҚ Маңғыстау облыстық филиалының бас менеджері, лицензиялық құжаттардың аудиті және сараптамасы бөлімінің жетекші маманы болды.
  • 2006-2008 жылдар аралығында Маңғыстау облысы мемлекеттік сәулет-құрылыс бақылау басқармасы басқармасының лицензиялар бөлімінің бас маманы болды.
  • 2008 жылдан 2012 жылға дейін Маңғыстау облысы құрылыс басқармасының бөлімінде бас маман, мемлекеттік сатып алу бөлімінің бас маманы, құрылыс басқармасы басшысының орынбасары болып жұмыс істеді.
  • 2012-2013 жылдары Қызылорда облысында құрылыс бөлімінің басшысы, құрылыс басқармасы басшысының орынбасары;
  • 2014-2016 жылдары-Қызылорда облысының мемлекеттік сатып алу басқармасының басшысы;
  • 2016 жылдан 2017 жылға дейін "СК-Фармация" жауапкершілігі шектеулі серіктестігі департаментінің директоры;
  • 2017-2020 жылдар аралығында Ақтау қаласының әкімі;
  • 2020 жылдың маусым айынан бүгінгі күнге дейін Маңғыстау облысы әкімінің орынбасары қызметін атқарды.

Өңір әкімдігі сайтының мәліметінше, депутаттар ұсынылған кандидатты мақұлдап, Ғалымжан Ниязовты тәжірибелі маман ретінде білетіндерін атап өткен.

Ал Нұрлан Ноғаев Тілек Көшмағамбетовке атқарған жұмысы үшін алғыс айтып, Ғалымжан Ниязовқа Маңғыстау ауданының әлеуметтік-экономикалық дамуына қатысты бірқатар нақты тапсырмалар берді.

Айта кетейік, үстіміздегі жылдың ақпан айында Ғалымжан Ниязовтың қызмет бабын асыра пайдаланды деген күдікпен ұсталып, ол қамауға алынды.

Кейін шенеуніктің жазасы үйқамаққа ауыстырылғаны, мамыр айында Маңғыстау облысы әкімінің орынбасары жұмысқа шыққаны белгілі болды.

Ал inAktau.kz сенімді ақпарат көздеріне сілтеме жасай отырып, Ниязовқа қатысты қылмыстық істің жабылғанын, бірақ бұл ақпараттың әзірге ресми түрде расталмағанын мәлім еткен.

Мақаланың түпнұсқасы: https://kaz.nur.kz/politics/1988197-tergeuge-tusken-galymzan-niyazov-mangystauda-zana-qyzmetke-tagaiyndaldy/