Тоқаев: Ертістің суын тиімді, үнемді пайдалануға айрықша мән берілуі керек

Опубликовано:

Қасым-Жомарт Тоқаев
Қасым-Жомарт Тоқаев Павлодар жұртшылығымен кездесуде. Фото: Telegram/БОРТN1

Президент Қасым-Жомарт Тоқаев Павлодар жұртшылығымен кездесуінде өңірді таза сумен қамту және Ертіс өзенін тиімді пайдалану мәселесіне ерекше тоқталды, деп хабарлайды БОРТN1 Telegram арнасы.

Президенттің сөзінше, үш жылда ауылдағы ағайынды таза сумен қамту көрсеткіші 55-тен 94 пайызға дейін өскен.

"Биыл аймақта осындай 19 жоба жүзеге асырылып жатыр. Әкімдік келесі жылы құны 14 миллиард теңге болатын тағы 39 жобаны қолға алуды ұсынып отыр. Осыған орай, Үкіметке қаржы бөлуді тапсырамын", - деді Қасым-Жомарт Тоқаев өңір жұртшылығы алдында сөйлеген сөзінде.

Осы ретте мемлекет басшысы еліміздің барлық елді мекенінде таза су қолжетімді болуға тиіс екенін атап өтіп, былтырғы Жолдауда 5 жылдың ішінде қалалар мен ауылдарды 100 пайыз сумен қамтамасыз етуді тапсырғанын еске салды.

"Үкімет осы міндеттің орындалуын ерекше бақылауға алуы керек", - деді президент.

Сондай-ақ мемлекет басшысы Павлодар өңірі үшін Ертістің орасан зор маңызы бар екенін айтып, облыс аумағындағы суармалы алқаптарға бөлінетін қаржыны көбейту туралы тапсырма берді.

"Бұл өзен – осы өлкенің тұрғындары, кәсіпорындары және ауыл шаруашылығы үшін негізгі тіршілік көзі. Соңғы үш жылда облыста суармалы жердің көлемі 1,5 есе артты. Алдағы уақытта оны тағы 2 есеге, яғни, 300 мың гектарға дейін ұлғайту қажет. Облыс әкімдігі осы мәселеге баса назар аударуға тиіс.

Үкіметке өңірдің суармалы алқаптарына бөлінетін қаржыны көбейтуді тапсырамын. Бұл азық-түлік қауіпсіздігі тұрғысынан ғана емес, халықты жұмыспен қамту үшін де өте маңызды. Судың тапшылығы экономиканы дамытуға кедергі келтіреді. Сондықтан, Ертістің суын тиімді, үнемді пайдалануға айрықша мән берілуі керек", - деді президент.

Бұдан кейін мемлекет басшысы Павлодардың транзиттік әлеуетіне тоқталды.

"Ертістен өтетін ескі көпір көлік-логистика саласын дамытуға мүмкіндік бермей отыр. Оның апатты жағдайда тұрғанына біраз жыл болды.

Көпір арқылы жүк көліктерінің жүруіне тыйым салынған. Бұған дейін облыс орталығын айналып өтуге жол ашатын жаңа көпір салу жоспарланған. Үкіметке келесі жылы осы жобаны бастауды тапсырамын. Жолды күтіп ұстауға баса назар аудару қажет", - деді Қасым-Жомарт Тоқаев.

Мақаланың түпнұсқасы: https://kaz.nur.kz/politics/1991226-toqaev-ertistin-suyn-tiimdi-unemdi-paidalanuga-airyqsa-man-berilui-kerek/