"ҚазМұнайГаз" IPO-ға қашан шығарылатыны белгілі болды

Опубликовано:

"ҚазМұнайГаз"
Фото: "ҚазМұнайГаз" ҰК АҚ баспасөз қызметі

"Самұрық-Қазына" ұлттық әл-ауқат қоры "ҚазМұнайГаз" компаниясын IPO-ға желтоқсанда шығарады, ал оның акциялары дивидендтерінің ең төменгі кепілді мөлшерін үш жылға белгілеуді жоспарлап отыр, деп хабарлайды ҚазАқпарат.

Бұл туралы "Самұрық-Қазына" қорының даму және жекешелендіру жөніндегі басқарушы директоры Ернар Жаңаділ айтқан.

"Желтоқсан айының басында "ҚазМұнайГаз" компаниясын IPO-ға шығаруды жоспарлап отырмыз. Уақыттың тығыз екенін де түсінеміз. Бірақ "ҚазМұнайГаз" ұзақ уақыттан бері IPO-ға, нақтырақ айтқанда халықаралық IPO-ға дайындалды. Сондықтан бізде толық дайындық бар. Дәл қазір келесі қадам қалай болатынын білеміз. Бүгінде ұсыныс акциялардың көлемін бағалау бағытында жұмыс жүргізіліп жатыр", - деді ол.

Агенттік мәліметінше, "ҚазМұнайГаз" акцияларының листингін 2022 жылдың соңына дейін жүзеге асыру жоспарланған. Акцияларды сатып алуға AIX және KASE биржаларының брокер-сауда мүшелері арқылы, сондай-ақ Tabys мобильдік қосымшасы немесе Қазпошта бөлімшелерінде тікелей жазылу арқылы өтінім беруге болады.

"Азаматтар брокерде шот ашпай-ақ эмитент акцияларына тікелей жазыла алады. Бұл IPO өткізу саласындағы жалпыға бірдей танылған әлемдік тәжірибе. Мысалы 2013 жылы Корольдік поштаның "Халықтық IPO-сы" сәтті кейстің бірі саналады. Біз бұл тәжірибені көптеген қазақстандық еліміздің кез келген жерінен ұлттық компанияның акцияларын жылдам сатып алу мүмкіндігіне ие болуы үшін қолдандық", - деді AIX басқарма төрағасы Ренат Бектұров Халықаралық инвесторлар апталығы аясындағы қаржылық сауаттылық форумында.

"ҚазМұнайГаз ҰК" АҚ басқарма төрағасының орынбасары - қаржы директоры Дәурен Қарабаевтың дерегінше, компанияның активтері 32 млрд долларды, меншікті капиталы 19 млрд долларды құрайды. Дивидендтер төлеу мүмкіндігі мұнай бағасына байланысты болады.

Ол "ҚазМұнайГаз" стратегиялық маңызды компания болып саналатынын, сондықтан акциялардың бақылаушы үлесі мемлекетте болатынын атап өткен.

Мақаланың түпнұсқасы: https://kaz.nur.kz/politics/1991675-qazmunaigaz-ipo-ga-qasan-sygarylatyny-belgili-boldy/