Тоқаев тілдер туралы: Оларды саяси құралға айналдыруға болмайды

Опубликовано:

Қазақ тілі кітабы
Қазақ тілі кітабы. Көрнекі фото: Pixabay.com

Бүгін Қасым-Жомарт Тоқаев еліміздің дамуына үлес қосқан қазақстандықтарға мемлекеттік наградалар табыс етті. Марапаттарды тапсырудан бұрын мемлекет басшысы сөз сөйлеп, тілді саяси құралға айналдырмау керек екенін айтты, деп хабарлайды БОРТ №1.

"Қазақстан халқын ұйыстыратын тағы бір символ – мемлекеттік тіл. Қазақ тілі мәңгілік мемлекеттік тіл тұғырында болады. Қазақ тілінің қолданыс аясын арттыра беру – мемлекеттің міндеті. Бұл жұмыс тоқтамайды, жалғаса береді", – деді мемлекет басшысы.

Президент көп тіл білудің артықшылығын айтты.

"Жақында мен "Өз тілің – бірлік үшін, өзге тілдер – тірлік үшін" деп айттым. Жастарымыз көп тіл білген сайын бәсекеге қабілетті, білікті маман болады. Тіл, ұлтаралық қатынас – ішкі тұрақтылыққа ықпал ететін өзара тығыз әрі маңызды факторлар. Сондықтан, мұндай маңызды мәселелерден саяси құрал жасауға болмайды", – деп ескертті мемлекет басшысы.

Мемлекет басшысы осындай қоғамдық тұрғыдан сезімтал мәселелерді саясиландырудың кесірінен кейбір елдердің қасіретті жағдайға ұшырағанын еске салды.

"Бұл – біздің жол емес" деді президент.

Еске салайық, бүгін мемлекет басшысы Қасым-Жомарт Тоқаев "Қазақстанға азаттық кездейсоқ бұйырды" дейтіндерге жауап берген еді.

Мақаланың түпнұсқасы: https://kaz.nur.kz/politics/1993940-toqaev-tilder-turaly-olardy-sayasi-quralga-ainaldyruga-bolmaidy/