Тоқаев таяуда Францияға және Ресейге ресми сапармен барады

Мемлекет басшысы Қасым-Жомарт Тоқаев келесі аптада Францияға және Ресейге ресми сапармен барады. Бұл туралы президенттің баспасөз қызметі Telegram-дағы ресми арнасында хабарлады.

Баспасөз қызметінің мәліметінше, Қасым-Жомарт Тоқаев 28 қараша күні Ресей Федерациясына ресми сапармен барады.

Мемлекет басшысы Мәскеуде Ресей президенті Владимир Путинмен келіссөз жүргізеді. Сондай-ақ екі ел басшылары Қазақстан мен Ресейдің Өңіраралық ынтымақтастық форумының жұмысына бейнебайланыс режимінде қатысады.

Ал 29-30 қараша күндері Қасым-Жомарт Тоқаев Францияға ресми сапармен барады. Қасым-Жомарт Тоқаев Парижде Франция президенті Эмманюэль Макронмен келіссөз жүргізеді деп жоспарланып отыр.

Келіссөз барысында сауда-экономикалық, инвестициялық және гуманитарлық салалардағы стратегиялық серіктестікті дамыту перспективалары талқыланады деп күтілуде.

Сонымен қатар мемлекет басшысы Францияның іскер топтары өкілдерімен бірқатар кездесу өткізеді.