ОСК жаңа екі партияға бірқатар облыстағы мәслихат сайлауына қатысуға рұқсат берді

Орталық сайлау комиссиясы бірқатар облыста "Байтақ" және Respublica партияларын барлық деңгейдегі мәслихат депутаттарының сайлауына қатысуға өткізу туралы қаулы қабылдады, деп хабарлайды KAZ.NUR.KZ тілшісі.

ОСК төрағасы Нұрлан Әбдіров "Байтақ" және Respublica саяси партиялары кандидатура ұсыну кезеңінде өңірлерде өз филиалы мен өкілдігін ашуға және олар тіркелгеннен кейін мәслихат депутаттарының сайлауына қатысуға рұқсат алуға мүмкіндігі бар екенін еске салды.

ОСК мүшесі Шавхат Өтемісов қазіргі уақытта "Байтақ" партиясының бірқатар облыста, сондай-ақ Алматы, Шымкент және Астана қалаларында филиалдары бар екенін айтты.

Нәтижесінде ОСК "Байтақ" партиясына Ақтөбе, Алматы, Батыс Қазақстан, Жамбыл, Қостанай, Маңғыстау, Павлодар, Түркістан, Шығыс Қазақстан облыстары, сондай-ақ Астана, Алматы және Шымкент қалаларында мәслихат депутаттарының кезектен тыс сайлауына қатысуға рұқсат берді. Бір апта бұрын бұл партияның мәслихат сайлауына қатысуына тек үш өңірде – Атырау, Қарағанды ​​және Қызылорда облыстарында рұқсат берілген болатын.

Respublica партиясы болса, Абай, Ақмола, Алматы, Ақтөбе, Батыс Қазақстан, Жамбыл, Жетісу, Қарағанды, Қостанай, Қызылорда, Маңғыстау, Павлодар, Солтүстік Қазақстан, Түркістан, Ұлытау, Шығыс Қазақстан облыстарының, сондай-ақ Алматы, Астана және Шымкент қалаларының мәслихат сайлауына қатыса алады.

Еске сала кетейік, өткен аптада партияның бірде-бір өңірде филиалдары болмаған, сол себепті мәслихат сайлауына қатысуға рұқсат етілмеген.

Айта кетейік, Respublica партиясы өткен аптада, ал "Байтақ" партиясы қараша айында тіркелген болатын.