Top.Mail.Ru

Сайт нұсқасы

ru kz

Зектілері

"Неге әлі пайдалануға берілмеген": Смайылов Шымкент әуежайындағы терминал құрылысын жеделдетуді тапсырды

Опубликовано:

Әлихан Смайылов Шымкент әуежайына барды
Фото: primeminister.kz

Шымкентке жұмыс сапарымен келген премьер-министр Әлихан Смайылов жоспарланған бағдарламадан бөлек, бірінші кезекте қалалық әуежайдың жай-күйімен танысып, жаңа терминал құрылысын жеделдетуді тапсырды. Бұл туралы primeminister.kz хабарлады.

Әлихан Смайыловтың сөзінше, Шымкент Шығыс пен Батыс арасындағы көлік қозғалысының түйіскен жерінде орналасқан еліміздегі үшінші ірі мегаполис. Бұл өз кезегінде тікелей және транзиттік рейстерді орындауға ыңғайлы жағдай жасайды.

Сонымен қатар премьер-министр Шымкент әуежайының жағдайы халықаралық мәртебеге сәйкес келмейтінін атап өтті.

"Жаңа терминал салу 2018 жылы тапсырылған болатын. Не себептен әлі күнге дейін пайдалануға берілмей отыр? Қалаға немесе елге келген туристер мен қонақтар ең алдымен әуежайдың жағдайына назар салады. Сол себепті тез арада жаңа терминалды пайдалануға беру керек", - деді Әлихан Смайылов. 

Шымкент қаласының әкімі Марат Әйтенов бүгінгі таңда жобаның 80 пайыздан астамы аяқталғанын, құрылыс 40 мың шаршы метрді алып жатқанын айтты. Терминал 2023 жылдың соңында толығымен пайдалануға беріледі. Қала басшысының айтуынша, бұл республикадағы ең ірі терминалдардың бірі болмақ.

Өз кезегінде үкімет басшысы әкімдікке жұмыстардың барлығын мүмкіндігінше тезірек аяқтап, құрылыстың одан әрі созылуына жол бермеуді тапсырды.

Мақаланың түпнұсқасы: https://kaz.nur.kz/politics/2007058-nege-ali-paidalanuga-berilmegen-smaiylov-symkent-auezaiyndagy-terminal-qurylysyn-zedeldetudi-tapsyrdy/

pixel