Тоқаев Украинадағы жағдайға қатысты Қазақстанның ұстанымын айтты

Мемлекет басшысы Қасым-Жомарт Тоқаев Украинадағы жағдайға қатысты Қазақстанның ұстанымын айқындады. Бұл туралы Ақорда Telegram-дағы ресми арнасында хабарлады.

Президент Қасым-Жомарт Кемелұлы күрделі мәселеге қатысты Қазақстан өз ұстанымын айқындағанын айтты.

"Біріншіден, біз БҰҰ Жарғысын қатаң сақтауымыз керек. Әрине, Біріккен Ұлттар Ұйымын әлемде теңдесі жоқ әрі әмбебап ұйым ретінде қолдауға тиіспіз.

Екіншіден, біз Қытайдың, сондай-ақ басқа да мемлекеттердің барлық бейбіт бастамасын қолдауымыз қажет.

Сондықтан жақын арада Украинадағы қарулы қақтығыс тоқтайды деп үміттенеміз. Содан кейін әлемнің осы бөлігінде берік бейбіт өмір орнайтыны туралы сөз қозғай аламыз.

Қазақстанға келетін болсақ, біз осы мақсатқа қол жеткізуге өз үлесімізді қосуға дайынбыз.

Сонымен қатар біз – Ресеймен стратегиялық серіктеспіз және бірнеше ұйымның мүшесі екенімізді атап өткен жөн. Сондықтан біздің мақсатымыз – екіжақты және халықаралық ұйымдар аясында өзара ынтымақтастығымызды нығайту үшін Ресеймен тығыз байланысты сақтау", – деді мемлекет басшысы.