Президент Батыс елдері жариялаған санкциялардың сақталуына қатысты пікір білдірді

Мемлекет басшысы Қасым-Жомарт Тоқаев Батыс елдері жариялаған санкциялардың сақталуына қатысты пікір білдірді. Бұл туралы Ақорда Telegram-дағы ресми арнасында жариялады.

Қасым-Жомарт Тоқаев Қазақстан ең алдымен ДСҰ ережелері мен нормаларын басшылыққа алатынын айтты.

"Сондай-ақ халықаралық нарықта қабылданған барлық ережені сақтаймыз. Ал екі мақсатта қолданылатын тауарлардың Ресейге экспорты туралы айтар болсақ, бұл мүлдем шындыққа жанаспайды. Өйткені, жаңа ғана айтқанымдай, біз ДСҰ ережесін және Еуропалық Одақ жариялаған барлық санкция талаптарын сақтаймыз.

Әйтсе де, Ресеймен сауда-саттық жасаймыз. Былтыр екі ел арасындағы тауар айналымының көлемі 28 миллиард долларға жетті. Бұл қолданыстағы халықаралық стандарттарға толық сай келеді", – деді мемлекет басшысы.