Мәжіліс депутаты Мақсат Толықбай "Қазақстан халқына" қорының мүшесі болды

Мәжіліс депутаты, белгілі журналист әрі тележүргізуші Мақсат Толықбай "Қазақстан халқына" қорының қамқоршылық кеңесінің мүшесі болды, деп хабарлайды қордың ресми сайты.

Қордың ресми хабарлауынша, дүйсенбі, 3 сәуір күні "Қазақстан халқына" қоғамдық қоры қамқоршылық кеңесінің кезекті бетпе-бет отырысы өтіп, онда бірқатар шешім қабылданған.

Отырыс барысында қамқоршылық кеңестің мүшесі болып мәжіліс депутаты, қоғамдық-саяси, әлеуметтік мәселелерді көтеріп жүрген белгілі журналист әрі тележүргізуші Мақсат Толықбай сайланған.

Мақсат Толықбай "Халық сүйіктісі – 2020", "Адал тұлға – 2021", сондай-ақ "Үздік тележүргізуші-2016, 2019" байқауларының жеңімпазы.

Айта кетейік, бұған дейін "Хабар агенттігі" АҚ директоры Берік Уәли алдағы аптадан бастап Мақсат Толықбаймен белгілі журналист Дана Нұржігіт кезектесіп "Хабар" арнасының басты саяси-қоғамдық ток-шоуын жүргізетінін айтқан еді.