Шымкентте "Қыс-2024" республикалық командалық-штабтық оқу-жаттығулары басталды

21 қараша күні Шымкентте "Қыс-2024" республикалық командалық-штабтық оқу-жаттығулары басталды. Бұл туралы KAZ.NUR.KZ қалалық ТЖД баспасөз қызметіне сілтеме жасап хабарлайды.

ТЖД Instagram-дағы мәліметіне сүйенсек, аталған оқу-жаттығу еліміздің барлық өңірінде төтенше жағдайлардың алдын алу мен жоюға дайындығын бағалау мақсатында өтіп жатыр. Республикалық оқу-жаттығу штабы Ақмола облысы Көкшетау қаласында орналасқан.

"Оқу-жаттығудың бірінші күні аясында Шымкентте "Энергоцентр-3" тіршілікті қамтамасыз ету нысанында тактикалық-арнайы оқу-жаттығулар өткізілді.

Оқу-жаттығу сценариі турбиналық цехқа газ жеткізетін газ құбырында жарылысты қарастырды, бұл өртке және қазандықтардың істен шығуына әкелді.

Апат салдарын жою үшін Шымкент қаласының Төтенше жағдайлар департаментінің және басқа да азаматтық қорғау қызметтерінің күштері мен құралдары жедел жіберілді", - делінген хабарламада.