Тоқаев Вьетнамнан келген жоғары лауазымды мейман мен оның жұбайына шапан жапты (фото, видео)

Президент Қасым-Жомарт Тоқаев Қазақстанға мемлекеттік сапармен келген Вьетнам Коммунистік партиясы Орталық комитетінің бас хатшысы То Лам мен оның жұбайына қазақтың салт-дәстүріне сай құрмет көрсетіп, шапан жапты. Бұл туралы KAZ.NUR.KZ хабарлайды.

Мемлекет басшысы мен қазақтың шапанын киген құрметті қонақтардың фотосы Telegram-дағы Борт №1 арнасында жарияланды.

Фото сипаттамасында ақын Қадыр Мырза Әлінің "Қазақ осы" әнін үзінді келтірілген.

Айта кетейік, сондай-ақ Қасым-Жомарт Тоқаев То Ламды І дәрежелі "Достық" орденімен марапаттады.

"Сіздің Қазақстанға мемлекеттік сапарыңыздың тарихи маңызы зор. Бұл қазақ-вьетнам қатынасын дамытудың маңызды кезеңі басталғанын көрсетеді. Бүгінгі келіссөздер қорытындысы бойынша екіжақты ынтымақтастықты жаңа деңгейге көтеретін стратегиялық серіктестік орнатуға келістік.

Бұл үшін мол перспективаға жол ашатын саяси ерік-жігер мен сауда-экономикалық әлеует жеткілікті. Екі ел арасындағы достықты нығайтуға айрықша үлес қосқаныңызды атап өткім келеді. Осы орайда сізге Қазақстан Республикасының мемлекеттік наградасы – І дәрежелі "Достық" орденін табыстауға рұқсат етіңіз. Қазақстан мен Вьетнам ықпалдастығын одан әрі арттыруға қолдау көрсете бересіз деп сенемін", - деді мемлекет басшысы.

То Лам Қазақстанның ең жоғары мемлекеттік наградасын тапсырғаны үшін Қасым-Жомарт Тоқаев пен қазақ халқына алғыс айтты.