RU

Тәуелсіздік күні Сыр елінде "Оқушылар үйі" мен дәрігерлік амбулатория ашылды

Гүлшара Әбдіхалықова "Оқушылар үйінің" ашылуында
Фото: Қызылорда облысының әкімдігі

Тәуелсіздік мерекесінде Сыр елінде бірқатар нысандар ашылды. Облыс әкімі Арал ауданына сапар жасап, аудандық "Оқушылар үйін" пайдалануға беру рәсіміне қатысып, жаңа ғимараттың жай-күйімен танысты. Оқушылардың игілігі үшін салынған нысанның ашылуымен құттықтап, лебізін білдірді деп жазады KAZ.NUR.KZ өңір әкімдігінің баспасөз қызметіне сілтеме жасап.

"Барлықтарыңызды аудандық "Оқушылар үйінің" ашылуымен құттықтаймын. Жаңа нысанда өнерлі ұландар тәрбиеленіп, ауданның мәдени дамуына зор үлес қосады деп сенемін. Мұнда балғындар түрлі үйірмелерге қатысып, өз шығармашылықтарын шыңдайтын болады" , - деді облыс әкімі Гүлшара Әбдіқалықова.

Нысанның құрлысы 2019 жылдың мамыр айында басталған. Сыйымдылығы 250 адамға лайықталған оқушылар үйінің құны 282,1 млн. теңгені құрады. Бас мердігер «SСS Инжиниринг» ЖШС-гі құрылыс жұмыстарын уақытылы аяқтады. Ғимараттың бірінші қабатында «Bioland», «IT» бағытындағы және «Би» үйірмелерінің бөлмелері орналасса, екінші қабатында «Шебер қолдар» үйірмесімен, фойеде суретшілермен жас қолөнершілердің көрмесі және акт залы бар.

Оқушылар үйі
Фото: Қызылорда облысының әкімдігі

Аймақ басшысы Шижаға елді мекеніндегі Дәрігерлік амбулаторияның ашылу рәсіміне де қатысты. Жаңа медициналық ғимарат 15 бөлмеден тұрады. Оның ішінде дәрігерге дейінгі көріну бөлмесі, қабылдау бөлмесі, тіркеу бөлмесі, егу бөлмесі, химизатор бөлмесі, әйелдер қарау бөлмесі, лаборатория, дәрі сақтайтын қойма, ана мен бала бөлмесі және күндізгі емдеу бөлмесі бар. Қазір мұнда 15 қызметкер жұмыс істейді. Жаңа нысан мемлекеттік-жекешелік әріптестік аясында бой көтерген. Облыс әкімі ауыл тұрғындарын жаңа нысанның ашылуымен құттықтап, амбулаторияның жұмысына сәттілік тіледі.

Жаңа амбулаторияның ашылуы
Фото: Қызылорда облысының әкімдігі

Сапары барысында облыс әкімі Жіңішкеқұм елді мекеніндегі №248 орта мектептің апаттық жағдайдағы спортзалын көріп, бақылады. Спортзал ғимаратын Қызылорда облысы мамандандырылған ауданаралық экономикалық сотының шешіміне сәйкес пайдалануға тиым салынған. Мұнан бөлек, «Баспана Қызылорда» ЖШС-нің сараптама қорытындысына сәйкес, ғимарат авариялық жағдайда деп танылған.

Содан кейін өңір басшысы Шөміш елді мекеніндегі кеңейтіліп және қайта жаңғырту жұмыстары жүргізілген ішкі су желісін пайдалануға беру рәсіміне қатысты. Аталған су желісінің ұзындығы 11,9 шақырымды құрайды. Ауыз су жүйесі «Өңірлерді дамыту-2020» бағдарламасы шеңберінде іске асқан. Шөміш ауылының ақсақалы Қосмырзалы Шахаров ел игілігіне бағытталған игі іс көпшілікке қуаныш сыйлағанын айтып, облыс әкіміне алғысын білдірді.

Жаңа амбулаторияның ашылуы
Фото: Қызылорда облысының әкімдігі

Облыс әкімі Гүлшара Әбдіқалықованың Арал ауданындағы сапары Қамыстыбас елді мекені тұсындағы «Батыс Еуропа – Батыс Қытай» автодәлізінің бойында орналасқан жеке кәсіпкер Жалғасбеков Талғаттың жол бойғы қызмет көрсету кешенінде қорытындыланды. Кәсіпкер кешенді 200 млн.теңгеге өз қаражаты есебінен салған. Мұнда 80 адамға арналған ас бөлмесі, 10 жатын бөлме және намаз оқитын орын бар. Жаңа нысан жанынан жанар май құю бекеті де орналасқан. Облыс әкімі кәсіп иесін жаңа нысанның ашылуымен құттықтап, кешен жұмысына сәттілік тіледі.

Арал ауданындағы сапары соңында өңір басшысы аудан әкімі Мұхтар Оразбаевқа мемлекеттік бағдарламаларды іске асыру нәтижелері бойынша межеленген жұмыстарды жалғастыруды және тұрғындардың сақтық шараларын сақтау мәселесін назарда ұстауды тапсырды.

Қызылорда облысындағы Тәуелсіздік күні
Фото: Қызылорда облысының әкімдігі

Мақаланың түпнұсқасы: https://kaz.nur.kz/press-relizy/1889718-tuelsizdik-kni-syr-elinde-okusylar-ji-men-drigerlik-ambulatoria-asyldy/