"Ауруханаларда орын жоқ": Әнші Айқын көпшілікті вирустан сақтануға шақырды

Отандық танымал әнші Айқын Төлепберген барша отандастарын коронавирус инфекциясынан қорғанып, сақтық шараларын қатаң орындауға шақырды. Өнер иесі бастапқыда COVID-19 індетіне сенбей, оған күмәнмен қарағанын жасырмады. Алайда, қауіпті вирус достары мен таныстарына жеткенде оның шын мәнінде бар екеніне көзі жеткен деп жазады KAZ.NUR.KZ.

Айқын Төлепберген жұқтыру деректерінің күрт өсуіне байланысты тіпті кейбір қалалардың ауруханаларында науқастарға орын табылмай жатқанын ашып айтты.

Ол Instagram парақшасында өз таныстары арасынан да COVID-19 диагнозы расталғанын хабарлады.

"Құрметті достар, менің Нұр-Сұлтан қаласындағы досымның ата-анасы коронавирус жұқтырып алды. Үш-төрт күндей дене қызуы көтеріліп, ауыр жөтеле бастаған. Ауруханаға жатқызбақ болғанымен, аураханаларда орын жоқ. Науқастар өте көп. Әрең дегенде жатқыздық. Белгілі болғандай, олардың өкпесінің 40%-ы зақымданған. Бұл қалжың емес.

Өзімнің дәрігер достарыма хабарластым. Алматыда да сондай жағдай екен. Орындар тапшы болып жатыр. Сол себепті, бұл вирусқа немқұрайлы қарамаңыздар. Арақашықтық сақтап, антисептиктерді тастамаңыздар. Ата-аналарымыз аман болсын. Басында мен де күмәнмен қарадым. Достарым, таныстарып ауыра бастады. Ауруханаларда орын жоқ. Дистанция сақтаңыздар " , - деп жазды ол.