“Қазақ тегін дүниені жақсы көреді”: Мақсат Толықбайдың жазбасы елге ой салды

Отандық танымал журналист Мақсат Толықбай бүгінде бизнес-тренингтер өткізіп жүрген ”миллионерлерді” қатаң сынға алды. Ақпарат өкілінің сөзінше, олар халықты алдап, арам жолмен ақша табуда деп жазады KAZ.NUR.KZ.

Мақсат Толықбай Facebook парақшасында алаяқтарды әшкерелеп, олардың тактикасын рет-ретімен тізіп шықты.

Аталмыш жазба желіде бірден қызу талқыға түсіп, пікірталас тудырды. Қалың көпшілік журналистің сөздерімен келісіп, қазіргі қоғамда мұндай адамдардың күн санап көбейіп бара жатқанын айтты.

"Миллионер болғың келе ме? Бизнес-тренинг өткізгіштер неге көбейді? Бұл ақша табудың ең керемет жолы ғой. Ең қызығы, бизнесмен болуың шарт емес. Орақ тілді, от ауызды және манипуляцияның шебері болсаң жеткілікті. Жұртты бизнеспен айналысуға шақырардан бұрын, Дейл Карнегиден бастап адам сеніміне кірудің тоқсан тоғыз айласын үйрететін кемінде атақты 20 коучтың кітабын оқып шық! Сөйтіп, жұрттың санасына тренингке қатыссаң, өмірің өзгереді деген ойды мықтап сіңіресің.

Өзгергісі келетін кімдер? Жұмыссыз, қиын жағдайға тап болғандар, жалақысы аз, оңай олжаға кенеліп тез байып кетуді көздейтіндер. Сендіре алсаң болды. Кредит алып, соңғы тиынын санап беруден тайынбайды. Айтпақшы, семинардың тақырыбын "1 айда миллион теңге табудың жолдары", "бай болудың құпиясы", "іскер әйел бол" деп қоясың! Клиент тарту үшін бірінші сабағыңды тегін өткізесің. Қазақ тегін дүниені жақсы көреді. Жарнамасын айқайлатын мыңға жуық адам жинайсың.

Бай болудың құпиясын бірден жайып салмаймын, сізге керек "кілтті" 1 апталық ақылы курста оқытамын" дейсің. Отырғандардың 20 пайызы алдыңа қайта келеді. Алдап-арбап 300 адамнан 350 мыңнан жинап алсаң болды. Сол күннен бастап сен миллионерсің! 105 миллион теңге қалтаңда. Ойлаш. Фотосессия жасат, үстіңе қымбат киім киіп, астыңа қымбат көлік мініп, шашыңды жақпамаймен қайырып, іскер, дәулетті бизнесменнің рөлін сомдайтын бол! Арасында "неге өзге ұлт өкілдері бай болуы керек, қазақ жастары базарда арба айдауы керек пе?" деп өзіңді патриот ретінде көрсетіп қойсаң, тіпті, ауыздарын ашып, аһ ұрып, сені құдайдай көреді", - деп сыни тұрғыда жазды тележүргізуші.

Сөз соңында журналист отандастарын алаяқтардың арбауына түсіп қалмауға, оларға сенбеуге шақырды.

"Бүйтсең миллионер боласың, сөйтсең миллионер боласың" дейтін бизнес-тренерлер барлық елде бар. Өйткені, жылтыраққа жаны құмар, қиындыққа тап болған, тез байығысы келетін адамдар әр нәрседен үміттенеді. Ағайын, ақша оңайлықпен келмейді. Тек еңбек, еңбек, еңбек", - деді ол.