"Үкімет деген жай ғана аты": танымал құлсарылық блогер су тасқынына қатысты жанайқайын айтты

Танымал блогер Ахон Бержан су басқан өңірлерге қатысты жанайқайын айтты. Құлсарыда туып-өскен ол туған жерінің хал-ахуалына алаңдайтынын жеткізді.

Ахон өз пікірін Instagram парақшасында жариялады.

"Бұл қалада жұмыс жүріп жатыр, білетін шығарсыздар. Жұмыс жүргенімен, мына судың қанша уақыттан кейін кететінін белгісіз. Енді ойлаңыздаршы, су кеткеннен кейін қалаға қаншама нәрсе қажет болады. Дәл осы жағдайда бәрі бір-бірінен жаман тұсын іздеп бастап жатыр. Біресе әкімдік кінәлі, біресе техника кінәлі деп кете береді. Қазір ондай жағдайда емеспіз.

Мен өзім осы қалада туып-өскенмін. Әкемнен ең соңғы рет қала 1993 жылы суға батты дегенді естіп жүрдім. Содан кейін қайталанып тұрған су тасқыны осы", - деді ол видеода.

Блогер Құлсарыға қатысты айтары көп екенін де жасырған жоқ.

"Халықтан ақша жинағым келмейді, онсыз да несиеде отыр. Халыққа есепті блогерлер беріп жүрген шығарсыздар. Бірақ үкімет емес. Үкімет деген жай ғана аты. Үкіметтің қалтасындағы ақша сіз бен біздікі(халықтікі). Ол ақшамызға көз жұмып, өз қалтамыздан шығарып жатқанымызды естен шығармайық.

Әр нәрсенің сұрауы Бар! Көздерің ашық, көкіректерің ояу болсын қазағым. Сіз бізге, біз сізге тірекпіз", - деді ол видео астындағы жазбада.