"Бір бума ақшаны суға ағыздым": әнші Нұрболат Қанай өмірден өткен інісін еске алды (видео)

Көпшілікке Qanay лақап есімімен танымал әнші Нұрболат Қанай ел білмейтін сырын бөлісті. Өнер иесі "Ұйқым келмейді" бағдарламасында қайтыс болған інісі жайлы айтты, деп жазады KAZ.NUR.KZ.

"Дияр деген інім болған. Лейкемия дертіне шалдығып, өмірден озып кетті. Оның еміне ақша жинап жүрдім. Ол кезде мешіт қасындағы намазханада тұрамын. Миск, жайнамаз, кітап сатып жүрген кезім еді. Айына 15-20 мың теңге алатынмын. Өзімше осылай қолдау көрсеткім келген.

Лейкемияға шалдыққандарға қалай көмектесуге болатынын қарап, ізденіп жүрдім. Сонда білгенім, оларға сенімділік білдіру керек екен. Олардың 70-80 пайызы солай жазылып кетеді екен. Мен де солай ініме шабыт беріп, көмектесем деп жүргенде, ол дүниеден өтіп кетті. Сол кезде жинаған ақшамды суға ағызып жібердім. Өкініш болды, жетей алмай қалдым", - деді Нұрболат Қанай.

Сонымен қатар әнші ағасы екеуінің ерте есейгенін айтты.

"Дияр 7 жасар болды. Ал мен 10-11 сынып оқитынмын. Өзімізбен-өзіміз өстік. Ол кезде әкем 2-3 айлап жұмыс істейді. Дәрілердің бәрі қымбат. Әке-шешеміздің ауызына қарап отыра бермей, "Көмектесейік" деп ағам екеуІміз табылған жұмыстың бәрін істедік", - деп сырын айтты әнші.

Сондай-ақ Нұрболат Қанай айына 2 рет қайырымдылық концерт беруді дағдыға айналдырғанын да жеткізді.

Мәтіннен қате тапсаңыз, бізге жазыңыз