Алғаш рет ораза ұстаушыға арналған 15 пайдалы кеңес

Алғаш рет ораза ұстауға бекінген мұсылмандарға көмек болатын 15 пайдалы кеңесті mazhab.kz сайты назарға ұсынды деп хабарлайды NUR.KZ.

1) Сіз ораза ұстайтын жалғыз адам емессіз.

Оразаны сізге дейін де миллион адам ұстаған және Алла қаласа, сізден кейін де талай адам жалғастырады. Ораза - бір ай бойы аш жүру деген сөз емес. Бар болғаны сіз күндіз ішетін тамақтарыңызды енді түнде ішетін боласыз.

2) Оразаның құндылықтары, Алла алдындағы дәрежесі туралы толығырақ білуге асығыңыз, жиі еске алыңыз.

Бұл сіздің оразаға деген құлшынысыңызды арттырады.

3) «Биыл ораза ыстық мерзімге түсіп тұр, шыдай алмаймын-ау» деген ой маза бермей ме?

Ғалымдар адамның қарнында өз денесін екі тәулік бойы алып жүруге жеткілікті деңгейде тамақ болатынын дәлелдеген.

Есіңізде болсын! Алла Тағала адамға шамасы келмейтін нәрсені жүктемейді!

4) Ораза тұтпауға өзіңді алдап, түрлі себеп пен сылтау тауып алу оп-оңай.

Мысалы, «кешке дейін жұмыста отырамын, аш болсам, басым істемей қалады» дейтін сылтаулар бар.

5) Бірнеше жыл бойы ораза ұстап жүрген білімді, салиқалы кісілермен сұхбат құрыңыз.

Кеңес сұраңыз. Тіпті, оразаны алғаш рет ұстағалы отырған адамдармен де пікір алмасыңыз.

6) Дерек көздері көрсетілген, сенімді кітаптардан оразаны дұрыс тұтудың жолдарымен танысыңыз.

Мешіт имамына барып, кеңес сұраңыз.

7) Нашар әдеттеріңізді тастауға бел буыңыз.

Ғайбат, өсек-өтірік айту секілді нашар қасиеттерді біртіндеп жеңуге тырысыңыз.

8) Күн тәртібіңізді біртіндеп өзгерте бастаңыз.

Себебі, бұл айда күн тәртібіңіз күрт өзгереді. Тамақты басқа уақытта ішіп, ерте оянасыз. Асқазаныңызды таңертең едәуір тамақ жеуге үйретіңіз. Ерте тұруды әдетке айналдырыңыз.

Бұрын-соңды дүниелік шаруаларыңыз көп болса, рухани жаттығуларға орын босату керек болады. Теледидар мен ғаламторда отырудың сүюшілерден болсаңыз, осы бастан шекара қоя біліңіз.

9) Ауру-сырқатыңыз болса, дәрігерге қаралыңыз.

Қажетті ем-домды қабылдаңыз. Алла Тағала бекіткен құлшылықтар адам баласына қиындық тудыруды мақсат етпейді.

Оразаның денсаулығыңызға орын толтыра алмастай зарар тигізбейтініне көз жеткізіңіз.

10) Темекі шегетін болсаңыз, Рамазан – бұл әдепсіздіктен арылуға көмектесетін ұлы мүмкіндік.

Осы бастан әрекет жасаңыз. Үнемі сағыз шайнаушылардан болсаңыз, мұныңызды да жайына қалдырғаныңыз абзал.

11) Егер әдетіңізге айналған болса, дүйсенбі, бейсенбі күндердің оразасын әрі қарай жалғастырыңыз.

12) Намазыңызға бекем болыңыз.

Нәпіл намаздарыңызды, түнгі намаздарыңызды жиілете бастаңыз. Әлі де бес уақыт намазды толықтыра алмай жүрсеңіз, сауаптар еселенетін Рамазаннан кейінге қалдырмаңыз.

13) Күн сайын Құранды қолға алыңыз.

Құранның мағыналық аудармасына көз жүгіртіңіз.

14) Арнайы дұғаларды жаттаңыз.

Рамазан – дұға айы болғандықтан, Құран мен сүннетте келетін дұғаларды жаттай беріңіз.

15. Ораза ұстауыңызға қарсылық танытатындардың болатындығына дайын болыңыз.

Әдетте, жанашыр адамдар сіздің денсаулығыңызды, аптап ыстықта қиналатындығыңызды ойлап қарсы келіп жатады.

Алайда, сіз барынша сабыр сақтап, оразаның қасиеттерін, негізгі мақсатын және оның денсаулыққа пайдасын жеткізіңіз.

Бізбен бөлісер қызықты әрі маңызды жаңалығыңыз болса, NUR.KZ порталының WhatsApp нөміріне жолдаңыз: + 7 747 535 12 98

Мақаланың түпнұсқасы: https://kaz.nur.kz/society/1730540-algas-ret-oraza-stausyga-arnalgan-15-pajdaly-kees/