Алматы маңында бұзылып, жол шетінде тұрған көлікті КамАЗ қағып кетті (фото)
Опубликовано:
9 шілдеден 10-ына қараған түнде Қапшағай тас жолында жантүршігерлік жол апаты орын алды. Жол-көлік оқиғасы салдарынан тоғыз жасар қыз қаза тауып, тағы жеті адам түрлі жарақат алды деп жазады Zakon.kz сайтына сілтеме жасаған KAZ.NUR.KZ.
Басылымның мәліметінше, Toyota Previa Алматы бағытында жүріп келе жатқан.
Тас жолдың 37 шақырымында көлік дөңгелегінің желі шығып кетіп, жүргізуші тоқтауға мәжбүр болады. Ол дөңгелекті ауыстырмақ болып, көлік жанына арнайы белгі мен апатты сигналдарды орнатқан.
Көліктегі жолаушылардың бірі оған ұялы телефон көмегімен жарық түсіріп, көмектесіп тұрыпты.
Бірер уақыттан соң, жүргізушіге көмектесіп тұрған әйел бір көліктің үлкен жылдамдықпен оларға қалай жүйіткіп келе жатқанын айтады.
Ескерту белгілеріне қарамастан дөңгелегінің желі шығып кеткен көлікке КамАЗ келіп соғылған.
Жойқын соққы салдарынан Toyota көлігінің сырты мен төбе жағы жұлынып кеткен.
Жантүршігерлік жол апаты салдарынан тоғыз жасар қыз қаза тапты. Тағы жеті адам түрлі жарақат алған.
Оларды жедел жәрдеммен бірден ауруханаға жеткізді. Қазіргі таңда екі жолаушы аса ауыр жағдайда жатыр.
Жапониялық көліктің жүргізушісі уақытылы шетке шығып кеткендіктен зардап шекпеген.
Жүк көлігін тізгіндеген азамат болса жолдың шетінде тұрған темір тұлпарды көрмей қалғанын айтты.
Тәртіп сақшылары оқиғаның мән-жайын анықтауда.
Мақаланың түпнұсқасы: https://kaz.nur.kz/society/1803889-almaty-maynda-zantrsigerlik-zol-apaty-oryn-aldy-foto/
