Алматы облысында Заречный кенті карантинге жабылды

Коронавирустың таралуына байланысты Алматы облысында Заречный кенті карантинге жабылды. Бұл туралы облыс әкімінің баспасөз қызметі мәлімдеді деп хабарлайды KAZ.NUR.KZ.

"Бүгін Қапшағай өңірінде COVID-19 індетін жұқтырған 13 адам тіркелді. Олардың бесеуі Қапшағай қаласында, алтауы Заречный кентінде анықталса, екі адам – Атыраудан жеткізілген "Теңізшевройл" ЖШС-ның вахталық жұмысшылары. Ауырғандардың үлкені 1958 жылы туған азамат, кішісі – 8 айлық бала.

Қазіргі уақытта Қапшағай өңірінде жалпы саны 15 адам тіркеліп отыр.

Осыған байланысты Қапшағай қалалық штабтың шешімімен Заречный кентінде бүгіннен бастап карантин енгізілді", - деп хабардар етті әкімдіктен.

Сондай-ақ, коронавирус табылған адамдардың барлығы тиісті ем алу үшін медицина мамандарының бақылауына алынған.

Сонымен қатар COVID-19 жұқтырғандармен байланыста болған 187 адам анықталған. Олардың 24-і – жақын, 163-і – сырттай қарым-қатынаста болғандар.

Қазір байланысты болғандар оқшауланып, эпидемиологиялық тексерулер жүргізілуде.

Еске сала кетсек, бұған дейін Алматы облысындағы Жаркент қаласының 30 сәуір сағат 00.00-ден бастап карантинге жабылатынын хабарлаған едік.

Ең маңызды әрі қызықты жаңалықтарды біздің Instagram парақшамыздан оқыңыздар>>