RU

Мамин экономиканы жаңғырту жөніндегі мемлекеттік комиссия отырысын өткізді

Премьер-министр Асқар Мамин экономиканы жаңғырту жөніндегі мемлекеттік комиссияның отырысын өткізді деп хабарлайды KAZ.NUR.KZ үкімет басшысының ресми сайтына сілтеме жасап.

Фото: primeminister.kz
Фото: primeminister.kz: UGC

Мемлекеттік комиссия отырысында Қарағанды облысы Саран қаласындағы бұрынғы резина техника бұйымдарының зауыты базасында ірі өнеркәсіп жобаларын іске асыру мәселелері қаралды. 

Атап айтқанда, «Yutong» маркалы автобустар мен арнайы техниканы құрастыруды ұйымдастыру жоспарланған. Жобаға салынатын инвестиция көлемі 22 млрд теңгені құрайды, кәсіпорынның жобалық қуаттылығы — жылына 1 200 автобус және 500 бірлік арнайы техника мен арнайы көлік.

Сондай-ақ «Doublestar» маркалы автомобиль дөңгелегін өндіру жолға қойылады. Жобаға 56 млрд теңге инвестиция салып, жыл сайын жеңіл көлік үшін 3 млн дөңгелек және коммерциялық техника үшін 500 мың дөңгелек шығару көзделген.

Бұдан бөлек, резина техникасы зауыты алаңында дайын өндірістік ғимараттар кешені (Ready Built Factory) құрылады, онда шағын кәсіпкерлер индустриялық жобаларды, оның ішінде құраушы бөлшектер мен компоненттерді өткізетін болады. 

Отырысқа қатысушылар Солтүстік Қазақстан және Қостанай облыстарының агрохолдингтерінің инвесторларына мемлекеттік қолдау көрсету, 2016-2020 жылдарға арналған Жекешелендірудің кешенді жоспарын іске асыру, өңдеу өнеркәсібі кәсіпорындарының қызметі және т.б. мәселелерді қарастырды. 

Мақаланың түпнұсқасы: https://kaz.nur.kz/society/1859186-mamin-ekonomikany-zagyrtu-znindegi-memlekettik-komissia-otyrysyn-tkizdi/