Аман Тасыған коронавирус жұқтырған науқастар жатқан ауруханада болып қайтты (видео)

Отандық танымал журналист Аман Тасыған елордадағы коронавирус жұқтырған науқастар жатқан ауруханаға барып қайтты. Ақпарат өкілі COVID-19 инфекциясымен күресіп жатқандардың қандай ем қабылдап жатқанын өз көзімен көрді. Ол өз басын қауіпке тігіп, күні-түні тынбай жұмыс істеп жүрген дәрігерлердің еңбегін жоғары бағалады деп жазады KAZ.NUR.KZ "TalkLike" бағдарламасына сілтеме жасап.

Аман Тасыған 11 маусым күні денсаулық сақтау министрі Елжан Біртановтан сұхбат алып, одан коронавирус жұқтырғандар жатқан аурухананы көрсетуін сұраған. Министрлік басшысы өзі берген уәдесінде тұрып, ертесіне оны COVID-19 науқастарына арналған емханаға кіргізді.

Алайда, онда кірмес бұрын журналист арнайы киім киіп, бетін толығымен тұмшалауға міндетті болған. Барлық сақтық шараларын қолданғаннан кейін ол аурухананы аралауын бастады.

Аман Тасыған алдымен жансақтау бөліміне кіріп, ондағы науқастардың жағдайын көріп шықты. Журналист коронавирус инфекциясы салдарынан ауыр күйге тап болған азаматтардың шынымен қатты қиналып жатқанына көзі жетті.

Одан кейін ақпарат өкілі жай палаталарды да аралап, тіпті науқастардың бірімен тілдесіп үлгерді. Аурухананың тыныс-тіршілігін өз көзімен көрмейінше вирусқа қатысты екі ойлы болған журналист сөзін қайтып алды. Ол жантүршігерлік көрініске өзі куә болғанан кейін коронавируске енді толығымен сенетін болғанын айтты.

"Оң жағыңа да, сол жағыңа да қарасаң өмір мен өлімнің арасында, үміт пен үрейдің арасында жатқан науқастар. Осыған дейін бұл вирусқа сеніңкіремей, екі ойлы болғандар қатарында едім. Енді бәрін өз көзіммен көрдім" , - деді ол.

Аман Тасығанның COVID-19 жұқтырғандар жатқан аурухананы аралап жүрген сәтін 1:05:00 минутынан бастап көре аласыздар.

Мәтіннен қате тапсаңыз, бізге жазыңыз