RU

Қалыңдық Оралда, күйеу жігіт Кореяда: Қазақстандағы ерекше той қалай өтті

Орал тұрғыны шаңырағында ерекше сырға салу рәсімін өткізді. Құдалар сый-қадені курьер арқылы жіберіп, қонақтар салтанатты мерекеге ZOOM арқылы қатысқан хабарлады KAZ.NUR.KZ "Хабар 24" арнасына сілтеме жасап.

рарарара
Фото: Хабар 24: Depositphotos

Жарылғап Дүйсенов бүгінде қос ұл, бір қыз тәрбиелеп өсірген. Үлкені Темірлан Қапшағайда әскери дәрігер болса, кішісі Жұмабек Алматыда, ақпараттық технология маманы. Екеуі де үйленіп, бала-шағалы болған.

Кенжесі Қорлан да өткен жылы теңін тапқанын айтыпты. Құдалар елордада кездесіп, 2020 жылы той жасауға уәделескен.

Алайда үйдегі жоспарды түздегі жағдай бұзатыны рас екен.

"16 шілде күні сырға салу рәсімі, 17-сі қыз ұзату тойы болуы керек еді. Елімізде, дүниежүзінде болып жатқан жағдайларға байланысты оның бәрін тоқтатуға тура келді. Тойды маусымның 13-і деп белгілегенбіз. Кейін оны 17 шілдеге жылжыттық. Сосын доғаруға тура келді", - дейді қала тұрғыны Жарылғап Дүйсенов.

Дүйсеновтер отбасы індет өршіп тұрған кезде болашақ құдалары мен тума-туыстың денсаулығын қатерге тіккісі келмепті. Сондықтан сырға салу, құда түсу рәсімін онлайн өткізуді ұйғарыпты.

Ағайынға Zoom бағдарламасы арқылы шақырту берілген. Көкшетаулық құдалар сырға мен сый-қадені курьер арқылы жіберіпті.

"Нұр-Сұлтан, Алматы, Көкшетау, ауылдан тума-туысқандар қосылды, таныстық. Асаба модератор болды. Біз өте ризамыз. Бастысы, балалар қосылып, оқуын жалғастырсын. Ал бергі жағында құдалармен араласып тұрамыз деп келістік", - дейді Қорланның анасы Нұргүл Қазимова.

26 жастағы Қорлан "Назарбаев университетінің" химия факультетін бітірген. Кейін Америкаға оқуға түскен. Алайда, пандемияға байланысты магистрлік дәрежемен шектелуге тура келіпті.

Енді Оңтүстік Кореяға докторантураға тапсырыпты. Болашақ жары да осы елде оқып жатыр екен. Мәди Арсақаймен ол университет қабырғасында танысыпты.

"Әрине, жағдайға түсіністікпен қарадық. Сондықтан тойды өткізбейміз деп шештік. Еш ренжіген жоқпын. Себебі үйлену тойы болмаса да Мәдимен, әрине, неке қиямыз. Мен Оңтүстік Кореяға барғасын 14 күн карантинде жатамын. Сосын 30 күннен кейін Қазақстанның елшілігінде некемізді қиямыз", - дейді қалыңдық Қорлан Дүйсенова.  

Мақаланың түпнұсқасы: https://kaz.nur.kz/society/1865547-kalydyk-oralda-kjeu-zigit-koreada-kazakstandagy-erekse-toj-kalaj-tti/