RU

Нұр-Сұлтанда пневмониямен ауыратындар саны 40,5 пайызға азайды

Нұр-Сұлтанда 5 шілдеден бастап енгізілген карантин шаралары мен амбулаториялық емдеуді күшейту нәтижесінде пневмониямен ауруханаға түскендер саны 40,5% – 1348-ден 793-ке дейін азайды. Сонымен қатар коронавирус стационарларына түскен науқастар саны 50,3%-ға кеміді деп хабарлайды KAZ.NUR.KZ қала әкімдігінің ресми сайтына сілтеме жасап.

Нұр-Сұлтанда пневмониямен ауыратындар саны 40, 5 пайызға азайды
Көрнекі фото: Хабар 24: Facebook

"Карантин шаралары, емханаларда амбулаториялық емдеуді күшейту және қала тұрғындарының санитария нормаларын қатаң сақтауы денсаулық сақтау жүйесіне, дәрігерлерге жүктемені айтарлықтай төмендетті. Жедел жәрдем станциясына қоңыраулар саны екі еседен астам азайды – тәулігіне 2400-ден 1129-ға дейін (52,3%). Соның ішінде КВИ бойынша – күніне 350-ден 112-ге дейін.

Карантинге дейін, коронавирустың ауыр дәрежесімені науқастар медицина мекемелеріне бірінен соң бірі түсіп жататын – дәрігерлер физикалық, моральдық тұрғыдан өте ауыр тиді. Денсаулық сақтау мамандары әр науқас үшін соңына дейін күресті. Қазір ауыр науқастар саны азайды.

Екі күн бұрын дәрігерлеріміз өкпесі 100%, 90% қабынған науқастарды емдеп шығарды. Азаматтардан карантин алынып тасталғаннан кейін де инфекцияның алдын алу үшін санитария нормаларын қатаң сақтауды сұраймыз", – деді денсаулық сақтау басқармасы басшысының міндетін атқарушы Әлия Рүстемова.

Осылайша, КВИ-ден емделіп шыққандар саны 67%-ды құрады – 9494 науқастың 6607-і сауығып шықты. Төсек-орын қорының жүктемесі 90%-дан 47%-ға азайды.

Айта кетейік, елордада екінші қалалық көпсалалы аурухананың бас дәрігері Иван Ли қайтыс болды. Шамамен бір ай бұрын одан COVID-19 дерті анықталған.

Мақаланың түпнұсқасы: https://kaz.nur.kz/society/1866740-nr-sltanda-pnevmoniamen-auyratyndar-sany-40-5-pajyzga-azajdy/