Алматы облысында 15 жасар қыз жігітімен бірге қашып кетті

Алматы облысында полицейлер із-түзсіз жоғалып кеткен 15 жасар қызды үйіне қайтарды. Жасөспірімнің жігітімен бірге болғаны анықталған деп жазады KAZ.NUR.KZ ІІМ ресми сайты Polisia.kz порталына сілтеме жасап.

10 қыркүйекте жасөпірімнің 48 жастағы анасынан қызының жоғалғаны туралы арыз түскен.

Болған жағдайды білген полиция мектеп оқушысын іздеуге кіріскен. Бейнекамераларды тексеру барысында тәртіп сақшылары қызды жас жігітпен көрген.

Полицейлер қыздың анасын сабырға шақырып, баласын жақын арада аман-есен табатындарын айтқан.

Тәртіп сақшылары жасөспіріммен телефон арқылы сөйлескен. Психологтармен бірнеше рет тілдескен соң жас қыз үйіне қайтуға келіскен.

Үш күннен соң, 13 қыркүйекте жоғалған қыз үйіне аман-сау оралған. Ол үйден кетуіне жігітімен қыдырғысы келгені себеп болғанын айтқан.

Қыздың анасы полицейлерге алғыс жаудырып, бұрын қызының мүндай әрекетін байқамағанын айтқан.

Жасөспірім де бұдан кейін үйінен кетпеуге уәде берді. Полицейлер қызбен профилактикалық әңгімелесу жүргізген.

Полицияның дерегінше, қыздың анасына қатысты материал толтырылып, кәмелетке толмағандар ісін қарайтын комиссияға жіберілген. Кәмелетке толмаған баланы тәрбиелеу жөніндегі міндеттерін орындамағаны үшін әйел жауапқа тартылуы мүмкін (ҚР Әкімшілік кодексінің 127 бабы, 1 бөлімі).

Еске сала кетейік, Алматы облысында 30 тамыз күні Еңбекшіқазақ ауданы Шелек ауылында 17 жастағы бозбала жоғалып кеткен болатын. Полицияға баланың туыстары жүгінген. Оны соңғы рет тұрғындардың бірі Қорғас-Алматы тас жолына бағыт алғанын көрген екен.

Кейінірек, 12 қыркүйекте кәмелетке толмаған жігіттің денесі табылды.