RU

Ақсу тұрғыны төрт оқушыға зорлық көрсетті деген күдікке ілінді

күдікті
Көрнекі фото: sputnik.kz

Павлодар облысы Ақсу қаласының тұрғыны екі жыл бойы төрт балаға зорлық көрсетті деген күдікке ілінді деп хабарлайды Sputnik Қазақстан.

Облыстық полиция департаментінің бастығы Нұрлан Мәсімовтің мәлімдеуінше, жыл басынан бері білім беру ұйымдары психологтермен бірлесіп, зорлық фактілерін анықтау мақсатында оқушылар арасында сауалнама жүргізіп, анонимділікті сақтау үшін "сенім жәшіктері" орнатылған.

"Мектептердің бірінде "сенім бөлмесі" ашылды. Атқарылған жұмыстардың нәтижесінде биыл 2016 жылдан 2018 жылға дейін жасалған 34 қылмыс тіркелді. Оның ішінде 23 факті бойынша Ақсу қаласының тұрғыны төрт оқушыға зорлық көрсетті деген күдікке ілінді", - дейді облыстың бас полицейі.

Ер адамның зардап шеккен мектеп оқушыларына кім болып келетіні туралы хабарланған жоқ.

Құқық қорғау ведомствосының мәліметінше, биыл Павлодар облысында жыныстық қол сұғылмаушылыққа қарсы қылмыстардың саны өткен жылдың дәл осы кезеңімен салыстырғанда екі есеге артқан.

"Талдау нәтижелері бойынша, кәмелеттік жасқа толмағандарға жыныстық зорлық-зомбылық көрсетуге қатысты 60 қылмыстың 13 немесе 22%-ін туыстары мен өгей әкелері жасаған", - деді Мәсімов.

Естеріңізге сала кетсек, бұған дейін Батыс Қазақстан облысында 15 жастағы қыз баланың тұрмысқа шыққаны туралы хабарлаған едік. Неке мешіт қызметкерлері, имамдар және кәмелетке толмаған баланың заңды өкілдерінің қатысуынсыз қиылған.

Мақаланың түпнұсқасы: https://kaz.nur.kz/society/1883547-aksu-trgyny-trt-okusyga-zorlyk-krsetti-degen-kdikke-ilindi/