RU

65 жастан асқан алматылықтарды тұмауға қарсы екпе алуға шақырды

Көшеде адамдар келе жатыр
Көрнекі фото: NUR.KZ/Петр Карандашов

Алматы қаласының өңірлік коммуникациялар қызметінің онлайн-брифингі барысында Жоғары медициналық колледждің директоры Светлана Сұлтанғазиева дезинфекция жүргізу мен алдын алу шараларының маңыздылығын атап өтті. Кәсіби маман 65 жастан асқан қала тұрғындарын санитарлық талаптарды сақтап, тұмауға қарсы екпе салуға шақырды деп жазады KAZ.NUR.KZ оңтүстік астана әкімдігінің баспасөз қызметіне сілтеме жасап.

Cветлана Сұлтанғазиева қаладағы коронавирусқа қарсы алдын алу шараларының қарқынды түрде жүзеге асырып жатқанын айтты.

Жалпыға ортақ орындардың қауіпсіздігін қамтамасыз ету мақсатында Алматыда кіреберістердің, балалар алаңдары мен аула аумақтарына аптасына үш рет дезинфекция жүргізу қызметіне қайта кірісті.

"Барлық ұйымдарда пандемия басталғаннан кейін дезинфекциялық тоннельдер қойылды. Біз оны ОСО-нан көріп жүрміз, көптеген нысандарда санитайзерлер, кварц шамдары орнатылған, олар тек қоғамдық орындарда ғана емес, сонымен бірге қоғамдық көліктерде де бар. Осының бәрі карантин жағдайында керек. Сондай-ақ, біз кіреберістер, балалар алаңдары мен көшеде дезинфекциялық жұмыстардың жүргізілуін құптаймыз, себебі эпидемиялық жағдайға байланысты ол жұмыстардың маңызы зор" , - деп атап өтті ол.

Сонымен бірге, С.Сұлтанғазиева коронавирустың алдын алудың негізгі шаралары туралы еске салды және тұрғындарды санитарлық-эпидемиялық талаптарды сақтауға шақырды.

"Біз коронавирус инфекциясын жұқтырудың негізгі жолы ауа тамшылары арқылы екенін білеміз. Сол себепті қоғамдық орындарда, көлікте бетперде тағып, әлеуметтік қашықтықты сақтау – осының бәрі алдын алу тәсілі болып табылады. Науқас адам түшкіреді, жөтеледі, соның есебінен ол инфекцияны басқаларға таратады. Бірінші кезекте, қауіп тобында иммунитеті төмен адамдар, яғни, қарттар, балалар, басқа да аурулары бар және ауыр дертпен есепке алынған науқастар бар" , - деген ол коронавируспен науқастанғандардың 30 пайызы қарт адамдар екенін айтты.

Осыған байланысты ол 65 жастан асқан адамдарды тұмауға қарсы екпе алуға, оқшаулану режимін сақтап, коронавирустың алдын алудың барлық шараларын сақтауға шақырды.

Мақаланың түпнұсқасы: https://kaz.nur.kz/society/1884274-65-zastan-askan-almatylyktardy-saktyk-saralaryn-saktap-tmauga-karsy-ekpe-aluga-sakyrdy/