Шымкентте ер адамның бассыз денесі табылды

Шымкентте жантүршігерлік оқиға орын алды. Қаланың саяжай аумағынан ер адамның бассыз денесі табылған. Күдікті уақытша ұстау изоляторына қамалып, тергеу жүргізіліп жатыр деп хабарлайды Sputnik Қазақстан.

Жергілікті тұрғындардың айтуынша, оқиға 8 қараша күні таңертең болған. Cаяжай аумағындағы бұталардың арасында ер адамның бассыз денесі табылды. Бұл туралы жергілікті Otyrar.kz басылымы хабарлаған соң белгілі болды. Полицейлер бірден аумақта тексеру жұмысын жүргізді. 

"Мәйітті тауып, полицейлер фото және видео түсірді. Біздің ауданда қылмыс болмайтын. 20 жыл ішінде қылмыс жасалғанын естіген жоқпын. Полиция жедел қызмет етті, көмектескені үшін алғыс білдіреміз", - деді "Қайнар-Бұлақ" саяжай ауданының тұрғыны Қорғанбай Досметов.

Тергеу оқиғаның мән-жайын айтпай отыр. Тек оқиғаға күдікті ретінде 2001 жылы туған азаматтың ұсталғаны хабарланды.

Қылмыстық кодекстің 99-бабы 1-бөлігіне сәйкес ("Адам өлтіру") сотқа дейінгі тергеу басталды. Бұл бап бойынша кінәлі деп танылған адам 8 жылдан 15 жылға дейін сотталады.

Еске сала кетейік, Алматы қаласында да жантүршігерлік қылмыс ашылды. Бейтаныс біреулер 34 жастағы әйелді көлікте аяусыз пышақтап өлтіріп кеткен. Марқұмның туыстары бұл өлімге оның жолдасының қатысы бар деп болжауда.

Айта кетейік, бұған дейін Түркістан облысының полицейлері дәрі-дәрмектерді заңсыз тасымалдау контрабандасының жолын кескен болатын.