RU

Сағынтаев: Алматыда ешқандай карантин болмайды

Алматының көшесі
Көрнекі фото: NUR.KZ

Алматы қаласының әкімі Бақытжан Сағынтаев мегаполисте қатаң локдаун енгізіледі деген ақпараттың шындыққа жанаспайтынын айтты деп хабарлайды ҚазАқпарат.

"Бірден айтайын, Алматыда ешқандай карантин болмайды. Бұл деректердің қайдан шыққанын білмеймін, бұл қауесет тез таралып жатыр", – деді әкім Almaty Invest форумы аясында.

Ол кеше ғана қала "сары аймақта" болғанын атап өтті.

"Денсаулық сақтау министрлігі таратқан мәліметке сәйкес, бүгінен бастап қайтадан жасыл аймаққа өттік. Біз "сары" мен "жасыл" аймақтың ортасында боламыз", – деді әкім.

Сонымен қатар Сағынтаев қаланың бас санитарлық дәрігерінің барлық шектеу шараларын міндетті түрде орындау керектігін жеткізді.

"Біз пандемиямен күресу үшін қаланы жаппауымыз керек. Алдымызға ондай мақсат қойған жоқпыз. Біз оны бастан өткердік, біз оған қанша күш жұмсалғанын білеміз. Бұл экономикалық тұрғыдан қалаға ғана емес, елге де қатты соққы болды. Бүгін біз карантин жариялаймыз. Алайда санитарлық-эпидемиологиялық қызметтің барлық талаптарын орындамасақ, онда біз қаланы жабуға мәжбүр боламыз", – деп атап өтті Бақытжан Сағынтаев.

Еске салсақ, WhatsApp мессенджерінде алдағы уақытта Қазақстанның аумағында екі апталық локдаун енгізілетіні туралы хабарлама тарап жатыр. Онда, тіпті азық-түлік дүкендері де жабылып, дәріханалар ғана бұрынғы режимде жұмыс істейтіні айтылған.

Айта кету керек, Қазақстанда өткен тәулікте тағы 769 адамның коронавирус жұқтырғаны анықталды. Осылайша, жалпы ел бойынша ауырғандар саны 133 887-ге жетті.

Мақаланың түпнұсқасы: https://kaz.nur.kz/society/1887695-sagyntaev-almatyda-eskandaj-karantin-bolmajdy/