Жергілікті тұрғын төрт әйелді өлтірген: Ақмола облысында жантүршігерлік қылмыс болды

Бурабай елді мекенінің тұрғыны төрт әйелді өлтірді. Қайғылы жағдай түнде орын алған деп жазады KAZ.NUR.KZ порталы Ақмола облыстық полиция департаментіне сілтеме жасап.

Ведомство таратқан ақпаратқа сәйкес, 5 желтоқсан, түнгі сағат 00:00-де Бурабай аудандық полиция басқармасының кезекшілік бөліміне жергілікті тұрғын хабарласып, Бурабай кентіндегі көпқабатты тұрғын үйлердің біріндегі пәтерде өзі адам өлтіргенін хабарлаған.

Оқиға орнына жеткен жедел-тергеу тобының зорлықпен өлтірілген 4 әйелдің денесін тапқаны белгілі болды.

Тәртіп сақшылары Бурабай кентінің бұрын ұрлық үшін бірнеше рет сотты болған 28 жастағы тұрғынын қолға түсірген.

Қазіргі уақытта оқиғаның мән-жайы анықталып жатыр. Күдікті уақытша ұстау оқшаулағышына қамалып, қылмыстық кодекстің 99-бабы бойынша тергеу жұмыстары басталды.

Еске сала кетсек, осыған дейін Алматы облысында 34 жастағы әйелді көлікте пышақтап өлтіріп кеткенін жазған болатынбыз.