ПТР-анықтамасыз блок-бекеттен өтпекші болған азаматтар ұсталды

тырау облысында Жылыой ауданының Теңіз полиция бөлімшесінің қызметкерлері кен орнына блок-бекетті айналып өтуге тырысқан бір топ адамның жолын кесті деп хабарлайды ІІМ ресми сайты Polisia.kz.

Теңіз полиция бөлімшесінің патрульдік полиция инспекторы Тілеуке Құмаров блок-бекетті айналып, кен орнына қарай бет алған “Lada Granta” автокөлігін көрген бойда басшылыққа хабарлап, өзі тоқтату үшін аталған көлікке бет алған.

Бір мезгілде сол бағытқа оның әріптестері де жолға шыққан. Полицейлер Құлсары қаласының 31 жастағы тұрғыны басқарып келе жатқан  көлікті вахталық кентке кіреберісте тоқтатты. Жүргізушіден басқа салонда төрт ер адам болған, олардың екеуі Орынбор қаласында тұратын Ресей азаматтары болып шықты.

Құжаттарды тексеру барысында үш жолаушының, оның ішінде бір ресейлік азаматтың қолында ПТР-тест тапсырғаны туралы анықтама болмай шықты. Көліктегі азаматтар “Теңіз” вахталық кенті аумағында орналасқан жауапкершілігі шектеулі серіктестіктердің біріне бармақшы болған.

Қазіргі уақытта жинақталған құжаттар тиісті шешім қабылдау үшін аудандық тауарлар мен көрсетілетін қызметтердің сапасы мен қауіпсіздігін бақылау бөліміне жолданды.

Айта кетейік, Қазақстан аумағында коронавирус пандемиясы әлі де басылған жоқ. Күні бүгін жұқтыру көрсеткіші бойынша көш бастап тұрған ШҚО-да карантин шаралары 30 желтоқсанға дейін созылатыны белгілі болды.