Зейнетақыны мерзімінен бұрын шешіп алу: Қанша қазақстандықтың өтініші мақұлданды

Қазақстандықтар зейнетақы жинағын мерзімінен бұрын алуға өтініш беруін жалғастырып жатыр.

Осы орайда "Отбасы Банкі" АҚ басқарма төрағасының орынбасары Нұрлан Ақшанов өзінің Facebook-тегі парақшасында осы уақытқа дейін қанша өтініш мақұлданғанын хабарлады.

"Келіп түскен өтініштер саны – 38 806. БЖЗҚ қазірдің өзінде оның 18 мыңын мақұлдады", – деп жазды Ақшанов әлеуметтік желіде.

Еске салсақ, 23 қаңтарда Қазақстанда тұрғын үй жағдайын жақсарту үшін берілетін зейнетақы жинағының бір бөлігін алуға өтінім қабылдау басталған болатын.

Алғашқы күні-ақ enpf-otbasy.kz онлайн-платформасында өтініш бергендер саны 11 мыңнан асып түскен болатын.

Өтініш беру үшін электрондық цифрлық қолтаңба қажет. Шешіп алудың қолжетімді сомасы жеткіліктілік шегіне тікелей байланысты болады.

Сонымен қатар enpf-otbasy.kz онлайн-платформасында "өтінімді жою" атты жаңа функция іске қосылған еді.

Айта кеткен жөн, уәкілетті оператор – БЖЗҚ-дан біржолғы зейнетақы төлемдерін алу үшін салымшылар жүгіне алатын ұйым. Мұндай операторлар тізімі тағы екі банкпен толықты.

Бірыңғай жинақтаушы зейнетақы қорының хабарлауынша, Altyn Bank және Банк ЦентрКредитпен өзара іс-қимыл туралы келісімдер жасалған.

Бүгін өткен үкіметтің кеңейтілген отырысында мемлекет басшысы зейнетақы жинағының бір бөлігін алуға байланысты тұрғын үй төңірегіндегі бағаның өсуі мен дүрбелеңге жол бермеу қажеттігін айтты.