ДСМ елімізде коронавирустан көз жұмған жасөспірім туралы айтты

Денсаулық сақтау министрлігінің баспасөз хатшысы Әсел Артақшінова елімізде 16 жастағы қыздың коронавирустан көз жұмғанын растады деп хабарлайды KAZ.NUR.KZ тілшісі.

Оның мәліметінше, жасөспірім қыз 2020 жылғы 9 шілдеде Ақмола облысының көп бейінді облыстық балалар ауруханасының жұқпалы аурулар бөлімінде қайтыс болған.

"Қазақстан Республикасы денсаулық сақтау министрлігі медициналық және фармацевтикалық бақылау комитетінің Ақмола облысы бойынша департаментінің сараптама нәтижелері бойынша: қыз баланың бала кезінен мүмкіндігі шектеулі екені, эндокринологтың, невропатологтың және психиатрдың диспансерлік есебінде тұрғаны анықталды.

Науқасқа қойылған қортынды диагноз: коронавирустық инфекция, ауыр түрі. Өкпе тінінің 75 пайыздан астамы зақымдануы екі жақты полисегментті пневмония", - дейді ол.

Артақшінованың сөзінше, науқаста Дауна синдромы, семіздік, темір жетіспеушілігінен болған анемия, қант диабеті сынды көптеген созылмалы ауру болған.

"Пациент өзін-өзі үйде 10 күндей емдегеннен кейін ауыр жағдайда ауруханаға түсті. Содан кейін 9 тәулік өкпені жасанды желдету аппаратына жатқызылды. Тағайындалған патогенездік және симптомдық терапия "коронавирус инфекциясын" диагностикалау және емдеу хаттамасына сай жүргізілді", - дейді Әсел Артақшінова.