"Ешкім қызығушылық танытпай отыр": Атырауда 900 млн теңгеге салынған полиция бекеттері бос тұр

Атыраудың кіреберісіндегі әрқайсысы 300 млн теңгеден астам қаржыға салынған 3 полиция бекеті бос тұр деп хабарлайды Астана телеарнасы.

Телеарнаның мәліметінше, оны күтіп ұстау жұмыстарын енді қала әкімдігі сенімгерлік басқаруға беруге тырысуда.

2018 жылы ғана салынған екі қабатты нысандардың жылыту қазандығы мен трансформаторы бөлек. Бейнебақылау камерасы да, көлік тұрағы да бар. Алайда аймақ кәсіпкерлері бұл нысандарға қызығар емес.

"2 рет шығардық. Телефон соғып, хабарласып сұраушылар бар. Екі-үш адам сұрады. Осындай нысан шығыпты, қатысайық деп едік деді. Алайда тендерге шығарылған уақытта ешкім қызығушылық танытпай отыр. Сол себепті үшінші рет шығарып отырмыз", - дейді Атырау қаласы әкімдігі Қаржы бөлімінің орынбасары Гүлхан Ғалымжанова.

Қызықпаудың да бірнеше себебі бар сияқты деп хабарлайды телеарна.

Өйткені шенділер кәсіпкерлерге нысанның барлық шығынын көтеріп қана қоймай, төтенше жағдай бола қалған жағдайда 24 сағат ішінде босатып беруді талап етіп отыр. Оның үстіне ғимараттан көрген жылдық пайдасының белгілі бір бөлігін қала қазынасына беруді міндеттейді.

Қомақты қаржыға салынған заманауи ғимаратты жергілікті полиция пайдаланып та үлгермеген.

ІІМ сыбайлас жемқорлыққа қарсы әрекеттерін жүзеге асыру жоспары аясында 2019 жылы бекеттерді жаппай алып тастаған еді.

Айта кетейік, бұл бекеттер өткен жазда күшейтілген карантин кезінде блок-бекет ретінде пайдаланылған.

Б. Надирқызы