RU

Мамин кімдердің жалақысы 330 мың теңгеден асатынын айтты

42500
Көрнекі фото: Sputnik / Абзал Қалиев

2023 жылға қарай педагогтердің айлығы екі есе өсіп, 330 мың теңгеден асады. Бұл туралы премьер-министр Асқар Мамин мәлімдеді деп хабарлайды Sputnik Қазақстан тілшісі.

"Педагогтердің жалақысы 2023 жылға қарай 2 есе, 330 мың теңгеден асатын болады. Орташа жалақы жыл сайын кемінде 25 пайыз өседі", - деді Мамин мәжілістегі Nur Otan фракциясының кеңейтілген отырысында сайлауалды бағдарламаны жүзеге асыру бойынша Жол картасының жобасын таныстырып.

Айтуынша, 2023 жылға қарай білім беру жүйесі білікті мұғалімдермен 100 пайыз қамтылады.

Бұдан бөлек, 3-6 жас аралығындағы балалар мектепке дейінгі тәрбиемен және оқытумен толық қамтылады.

Апатты және үш ауысымды мектептер мәселесін толық шешу үшін 800 мектеп салынады. Биыл 200 жаңа мектеп пайдалануға беріледі.

2025 жылы ауыл мектептері интернетке қосылады, сондай-ақ компьютерлермен және оқу процесін ұйымдастыруға қажет басқа жабдықтармен қамтамасыз етіледі.

Айта кетейік, бұған дейін сенат депутаттары балалар кардиохирургиясы саласында істейтін дәрігерлердің мәртебесі мен жалақысын көтеруді ұсынған болатын.

Мақаланың түпнұсқасы: https://kaz.nur.kz/society/1898680-mamin-kimderdin-zalaqysy-330-myn-tengeden-asatynyn-aitty/