RU

"Боратты еcке салды": Елордадағы сиыр британиялық БАҚ-тың назарына ілікті

Сиыр
Скриншот: NUR.KZ

Нұр-Сұлтандағы құрылыс алаңдарының бірінде кранның көмегімен сиырды көтеріп жатқан сәттің видеосы британиялық Daily Mail басылымының назарына ілікті деп хабарлайды KAZ.NUR.KZ порталы.

Белгілі болғандай, сиырды елорда тұрғындары құрбандық шалу рәсімін өткізу үшін жоғары көтерген екен. Шетел басылымы бұл жағдай оларға Бораттың фильміндегі көріністерді еске салғанын жазған.

Малды осылайша құрбандыққа шалу идеясы бригадир Олжас Есеналинге тиесілі болып шықты. Ол бірқатар кадрлық қиындықтарға тап болғасын осындай әрекетке барыпты.

"Бұл факт бойынша тексеру жүргізіліп жатыр. Оқиғаның барлық мән-жайлары нақтыланғаннан кейін, оларға заңды баға беріледі. Тәртіп бұзушы жауапкершілікке тартылады", - деген еді сол кезде құқық қорғау органдарының қызметкерлері.

Куәгерлер түсірген видеода ірі қараның соңғы минуттары көрсетілген. Байланған сиыр оны құрбандық шалатын жерге кранмен көтеріп жатқан сәтінде босап шығуға тырысып жатқанын видеодан байқауға болады.

Еске салсақ, бұған дейін елімізде жануарға қиянат жасаған жасөспірімдер жауапқа тартылуы мүмкін екенін жазған болатынбыз. Хайуанаттарға қатыгездік көрсеткендердің жасын 14-ке төмендету ұсынылды. Ішкі істер министрлігі бүгінде тиісті заң жобасын өзгертпекші.

Одан бөлек, Нұр-Сұлтан қаласында иттерге жыныстық зорлық көрсету ісі бойынша күдіктілер әлі табылмай жатқанын жазған едік. Елді дүрліктірген аталмыш іс Ішкі істер министрлігі, сондай-ақ аудан және қала прокуратурасының бақылауында.

Мақаланың түпнұсқасы: https://kaz.nur.kz/society/1899822-boratty-ecke-saldy-elordadagy-siyr-britaniyalyq-baq-tyn-nazaryna-ilikti/