Әйелі мен баласының өліміне дәрігерлерді кінәлаған Алматы тұрғыны жанайқайын айтты

Алматы облысының Панфилов аудандық перзентханасында ана мен бала көз жұмды. Бар болғаны 24 жастағы Жанар Баратова үшінші баласын босануы тиіс болған. Бірақ Жаркенттегі перзентханадан оның сәбиі мен өзінің мүрдесі шықты деп хабарлайды 31 арна.

Жанар іші ауырып, инфекциялық ауруханаға түскен. Марқұмның күйеуі Бейімбет Мұрат ай күні толған әйеліне бір күнде тоғыз система салғанын жеткізді.

"9 системаны әйелім көтере алмай, ауырып, перзентханаға түседі. Ол уақытта ай күні толып тұрған кез. Роддомға бір мен үштің арасында түскен. Түнгі сағат он екіге дейін оған ешқандай дәрігер көз қырын салмаған. 12-ден отыз минут кеткенде әйелімнің жатырынан суы кетіп, баланың жүрегі тоқтаған", - дейді ол.

Баласынан айырылған Жанардан қан тоқтамаған соң ешбір туысының рұқсатынсыз дәрігерлер әйелдің жатырын алып тастапты. Бірақ бұл отадан кейін де қан тоқтамаған.

Туыстарының сөзінше, асқазандағы жара жарылды деп айтылғанымен, сараптама оны жоққа шығарған.

"Ал экспертизаның айтуы бойынша, асқазанда ештеңе жоқ. Тіпті жара жоқ", - дейді марқұмның күйеуі Бейімбет Мұрат.

Ал медицина қызметкерлері Жанардың өліміне қан кету себеп болғанын алға тартты.

"Қан кетті асқазанынан, ішінен. Қан кету Ковидке де байланысты болуы мүмкін", - дейді "Панфилов ауданаралық көп салалы ауруханасы" КМК директорының орынбасары Гауһар Байдаханова.

Марқұмның туыстары Жанар коронавирустан көз жұмса, неліктен санитарлық талап бойынша жерленбегенін түсінбейтінін ашып айтты.

Мұсылманша жер қойнына тапсырдық деген отбасы Жаркенттегі перзентханадағылар ақша алмаса қарамайды деп күйініп отыр.