Елжан Біртановты үйқамақта ұстау мерзімі тағы ұзартылды

Бұрынғы денсаулық сақтау министрі Елжан Біртановты үйқамақта ұстау мерзімі тағы да ұзартылды. Бұл туралы оның адвокаты Дмитрий Кудряченко хабарлады деп жазады KAZ.NUR.KZ.

Экс-министрдің ісіне қатысты сот отырысы бүгін Нұр-Сұлтан қаласында өтті. Сот шешімі бойынша, Елжан Біртановты үйқамақта ұстау мерзімі 14 мамырға дейін ұзартылды.

"Бірақ белгілі бір уақытта үйден шығуға құқы бар", - дейді адвокаты Дмитрий Кудряченко.

Оның сөзінше, бұл жолы үйқамақта ұстау шарттары біршама жеңілдетілген.

"Сот үйқамақты жеңілдетіп, қоғам мен жанұясына пайдалы болу үшін сағат таңғы 08:00-ден кешкі 19:00-ге дейін үйден шығуға рұқсат берді. Алайда, қалған шектеулерге келсек, әрине қорғаушы тарап келіспейді. Қорғаушы тарап оны үйқамақтан толығымен босату керек деп санайды", - дейді Дмитрий Кудряченко.

Естеріңізге сала кетейік, Елжан Біртановтың ұсталғаны туралы ақпарат өткен жылдың қазан айының соңында пайда болған еді.

Кейін Қаржы министрлігінің Қаржылық мониторинг жөніндегі комитеті экс-министрдің қамауға алынғанын растады. Ведомство Біртановқа қатысты аса ірі көлемде бюджет қаражатын ысырап ету фактісі бойынша қылмыстық істі тергеп жатқанын мәлімдеді.

Кейін Дмитрий Куряченко экс-министрдің үй қамағына алынғанын хабарлады. Соңғы рет Елжан Біртановты үйқамақта ұстау мерзімі 30 сәуірге дейін ұзартылды.

Ал бүгін желіде бұрынғы министрдің суреті тарап кетті. Көпшілік Біртановтың қазіргі халіне алаңдаушылық білдірген.