Жамбыл облысында жоғалып кеткен қызды іздеу кезінде cүңгуір қайтыс болды

Жамбыл облысының Шу ауданында сүңгуір кәсіби міндетін орындау кезінде көз жұмды. Бұл туралы төтенше жағдайлар министрлігінің ресми өкілі Талғат Уәли хабарлады.

Оның сөзінше, сүңгуірдің денесі кеше табылған. Іздестіру-құтқару жұмыстарынің 35 күн бойы жүргізілгені белгілі болды.

Шу ауданының Тасөткел ауылынан 3 шақырым жерде, Тасөткел су қоймасында Алматы облысы төтенше жағдайлар департаментінің жедел-құтқару жасағы Жұмағали Әбдірахмановтың денесін тапқан.

Төтенше жағдайлар министрлігі ұсынған ақпаратқа сәйкес, іздестіру жұмыстары басталғаннан бері барлығы 130-дан астам адам, кинологтар, 16 техника, 2 тікұшақ, 9 жүзу құралы жұмылдырылған.

Айта кетейік, 2021 жылдың 3 сәуірінде Шу ауданының Тасөткел су қоймасында 1997 жылы туған азаматшаны іздестіру кезінде қатты желден қайық аударылып, салдарынан Жамбыл облыстық төтенше жағдайлар департаментінің жедел-құтқару жасағының бас құтқарушысы Жұмағали Жеңісбекұлы Әбдірахманов іс-түссіз кеткен болатын.

Жұмағали Жеңісбекұлы Әбдірахманов азаматтық қорғаныс органдарында 2001 жылдың наурыз айынан бері қызмет атқарып келген. Үйленген, артында екі баласы қалды

.

Мақаланың түпнұсқасы: https://kaz.nur.kz/society/1911788-zambyl-oblysynda-zogalyp-ketken-qyzdy-izdeu-kezinde-cunguir-qaitys-boldy/