RU

Аймағамбетов магистратура мен докторантураға түсу форматы қалай өзгергенін түсіндірді

Асхат Аймағамбетов
Асхат Аймағамбетов. Фото: Sputnik / Владислав Воднев

ҚР БҒМ басшысы Асхат Аймағамбетов білім саласында орын алған бірқатар өзгерістерге тоқталып өтті. Министр пандемия салдарынан олимпиадаларды, ҰБТ-ны ұйымдастырудан бастап магистратура мен докторантураға түскенге дейінгі барлық процестер электрондық форматқа көшірілгенін айтты деп жазады KAZ.NUR.KZ.

Асхат Аймағамбетов өзінің Facebook парақшасында білім саласындағы жаңашылдықтар жайлы жазба жариялады. Министрлік басшысы онда көптеген үрдістерді электрондық форматқа көшіру мәселесіне тоқталды.

"Жақында ҰБТ-ны электрондық форматқа көшіру туралы пост жарияладым. Бұл өзгерістерді қоғам жақсы қабылдап, қолдау білдірді. Бірақ, біз тек осы емтиханды ғана емес, барлық іріктеу іс-шараларының форматын ашықтық пен әділдікті қамтамасыз ету үшін өзгертудеміз. Осы бастамалар туралы қысқаша тоқталсам.
  • Біріншіден, оқушылардың пәндік Олимпиадасы. Біз биыл ақпан айында алғаш рет оқушылар арасында республикалық олимпиаданы электрондық форматта өткіздік. Әр қатысушыға жеке компьютер берілді, әр оқушының іс-әрекетін бейнекамера бақылап отырды. Сонымен қатар арнайы орталықта кезекшілер барлық процесті қадағалай алып, прокторинг жүйесі де қолданылды. Әлеуметтік желілерде және арнайы порталда ашық трансляция жүргізілді. Бұған қоса, біз биыл олимпиада тапсырмаларын тексеру жүйесін де өзгерттік. Бұрын қазылар алқасы мүшелеріне балалардың жұмыстары пропорционалды түрде берілсе, енді бағалау кезінде субъективизмді төмендету үшін қазылар алқасының әр мүшесі бір ғана тапсырманы көріп, бағалай алды. Келесі жылдары да олипиаданың облыстық және республикалық кезеңдері тек қана осындай форматта өтетін болады.
  • Екіншіден, докторантураға қабылдау. Биыл докторантураға түсу емтихандары да ҰБТ-ға қойылған талаптар негізінде және Ұлттық бірыңғай тестілеу жүргізілген пунктерде өтеді. Бұл бізге «ректорлар тізімі» деген алып-қашпа сөзді және осындай тәуекелдерді ұмытып, докторантураға ең мықты және лайықты үміткерлердің оқуға түсуіне тиісті жағдай жасауға мүмкіндік береді деп ойлаймын. Эссені де, басқа да тапсырмаларды да осы компьютерлермен бейнекамералардың алдында отырып жазатын болады.
  • Үшіншіден, магистратураға түсу. Өткен жылы біз магистратураға түсушілердің емтихандарын пилоттық режимде электрондық форматта қабылдадық. Оқуға түскен азаматтар емтиханның расында әділ түрде өткенін айтып жатыр. Биыл бұл жұмыс жалғасын табады. Бұдан былай магистратураның емтихандары осы форматта өтеді", - деп жазды БҒМ басшысы.

Сонымен қатар Аймағамбетов өзі министр болып тағайындалғаннан кейін бірден педагогтерге арналған Ұлттық біліктілік тестілеуді қағаз форматынан электрондық форматқа көшіргенін еске салды. Оның сөзінше, осыған байланысты тестілеуді жақсы тапсырған адамдардың саны бірден бірнеше есе қысқарғанына қарамастан, бұл жүйе сыбайлас жемқорлық пен көшіріп алу тәуекелдерін азайтуға мүмкіндік берді. БҒМ басшысы бұл бағыттағы жұмыстың әлі де жетілдірілетін тұстары бар екенін жоққа шығармады.

"Олимпиадаларды, ҰБТ-ны ұйымдастырудан бастап магистратура мен докторантураға түскенге дейінгі барлық процесті электрондық форматқа көшірдік. Осындай жаңашылдықтар арқылы әділдік пен ашықтыққа бағытталған бастамаларымызды жүзеге асырып жатырмыз. Ашықтықты және нақты бәсекелестікті қамтамасыз ете отырып, білім беру жүйесіне деген сенімді де арттырамыз. Әділдік, ашықтық, академиялық адалдық - бұл біздің жұмысымыздағы негізгі қағидаттар", - деді министр.

Мақаланың түпнұсқасы: https://kaz.nur.kz/society/1912486-aimagambetov-adildik-asyqtyq-bizdin-zumysymyzdagy-negizgi-qagidattar/