RU

СҚО-да жолға шығып кеткен жылқыны көлік қақты

Көрнекі
Көрнекі фото: NUR.KZ

Солтүстік Қазақстан облысында жеңіл көлік жүргізушісі қараусыз қалып, жолға шығып кеткен жылқыны қағып кетті деп хабарлайды KAZ.NUR.KZ өңірлік полиция департаментінің баспасөз қызметіне сілтеме жасап.

Ведомствоның мәліметінше, оқыс оқиға Шал ақын ауданында түнгі сағат 23.00 шамасында болған. "Жезқазған-Петропавл" жолының 796 шақырымында келе жатқан "Ford Maverick" көлігінің алдынан жол шетіндегі ағаш арасынан 5 жылқы атып шыққан. Ақан-Барақ ауылына бет алған 66 жастағы ер адам бірден көліктің тежегішіне басқанымен, жылқының біреуін қағып кетті. Жол-көлік оқиғасында ешкім зардап шеккен жоқ, тек көлікке зақым келді.

Оқиға орнына келіп жеткен полиция қызметкерлері бағусыз жүрген жылқылардың жергілікті ЖШС-ға тиесілі екенін анықтады. Малға жауапты бригадирдің айтуынша, жылқы үйірінен бөлініп кеткен. Оларды қараусыз жібергені үшін бригадирге әкімшілік жаза қолданылды.

"Бос жүрген мал ұрыларға оңай олжа ғана емес, сондай-ақ жолға шығып, жүргізушілерге қауіп төндіреді. Ауданда мұндай оқиғаларға жол бермеу үшін үнемі алдын алу үс-шаралары жүргізіліп тұрады" , - дейді Шал ақын ауданы полиция бөлімшесінің басшысы Руслан Мұхамбетжанов.

Мақаланың түпнұсқасы: https://kaz.nur.kz/society/1913034-sqo-da-zolga-sygyp-ketken-zylqyny-kolik-qaqty/