RU

Қытайда әр отбасының үш балалы болуына рұқсат беріледі

Сәби
Көрнекі сурет: pixabay.com

Қытайда демография саласында жаңа өзгеріс жоспарланып отыр. Әр отбасыға үш балалы болуға рұқсат етіледі. Бұдан бұрын әр отбасыдағы бала саны екіден аспайтын деп хабарлайды Sputnik Қазақстан.

Осылайша, жарты ғасырдан бері демографиясын бақылауда ұстап отырған Қытай тұрғындарының "құрамын" өзгертуге ниетті. Атап айтқанда, қартайған тұрғындар санын азайтып, гендерлік теңгерімсіздікті қалпына келтірмекші.

1970 жылдардың аяғында Қытайда қала тұрғындары үшін "Бір отбасы - бір бала" деген қатаң қағида енгізілді. Ал ауыл тұрғындарына әсіресе бірінші баласы қыз болса, екі балаға рұқсат етілді.

Нәтижесінде халық саны көп болғанымен, қартайған халықтың үлес салмағы өсіп отырды. Қытай тұрғындарының орташа жасы - 38,8.

Сонымен қатар қоғамда ерлер саны әйелдер санынан әлдеқайда басым түсіп, гендерлік теңгерімсіздік пайда болды.

2013 жылдан бері ерлі-зайыптылардың бірі әке-шешесінен жалғыз бала болған жағдайда, оларға екі балалы болуға рұқсат етілді. Енді кез-келген отбасы екі балалы бола алады.

Халықтың қартаюы салдарынан жұмысқа жарамды адамдар саны азаяды, отбасылардың егде жастағы адамдарды күтуге кететін шығыны мен уақыты артады және негізгі қоғамдық қызметтер жүйесіне қосымша қысым жасайды. Дегенмен Қытай билігі бұл жағдайдың оң әсерін де атап өтті. Бұл "күміс экономиканың дамуына", қарияларға арналған тауарлар мен қызметтердің көбеюіне және технологиялық прогресті ілгерілетуге түрткі болды.

Мақаланың түпнұсқасы: https://kaz.nur.kz/society/1915324-qytaida-ar-otbasynyn-us-balaly-boluyna-ruqsat-beriledi/