Қарағандыда ата-аналар төбелескен парктің бастығы жұмысынан босатылатын болды

Қарағанды облысының әкімі Жеңіс Қасымбек қаладағы орталық саябақта карантиндік нормалардың өрескел бұзылуына байланысты бірқатар шенеунікті жазалауды тапсырды. Бұл жайлы ведомствоның ресми сайтында хабарланды.

"Саябақ басшылығы, сондай-ақ қалалық әкімдіктің тәртіп үшін жауапты тұлғалары бұл күні азаматтардың бос уақытын қауіпсіз және санитарлық нормаларға сай өтуін қамтамасыз етпеген. Нәтижесінде 1 маусымда саябақта адамдардың шамадан тыс көп шоғырлануы орын алды. Бұл жағдайдың болуына жол берген жауапты тұлғалар қатаң жауапкершілікке тартылды", - делінген хабарламада.

Атап айтқанда, Қарағанды қаласы әкімінің екі орынбасары Нұрлан Бикенов пен Халел Әкімжановқа, сондай-ақ мәдениет бөлімінің басшысы Баян Нұртаеваға сөгіс жарияланған.

Сонымен қатар, ведомство саябақ басшысы Мәдина Әшірованың қызметінен босатылатынын атап өтті.

Еске сала кетсек, бұған дейін Қарағандыдағы саябақта ата-аналардың тегін аттракциондар үшін жанжалдасып қалғаны хабарланған еді.

Оқиғаға Мәдениет және демалыс саябақтары басқармасының желідегі хабарландыруы себеп болған. Мекеме сағат 1 маусым балалар күніне орай 12:00 мен 17:00 аралығында 14 жасқа дейінгі балалар бірнеше аттракционға тегін міне алатынын хабарлаған.

Осыған байланысты аттракциондарға кезек пайда болып, кей ата-ана тіпті кезек үшін төбелесіп қалған.

Осыдан кейін Қарағанды әкімдігі Орталық саябақтағы ақылы да, тегін де аттракциондардың жұмысы тоқтайтынын хабарлады. Бұған санитарлық нормалардың сақталмауы себеп болған.