Жаңаөзенде шаңды дауыл тұрды (видео)

Жаңаөзенде шаңды дауыл тұрды. Тұрғындар бұл сәттің видеосымен желіде бөлісуде деп хабарлайды inaktau.kz.

Аймақта ауа райының күрт бұзылуына байланысты "Қазгидромет" РМК-ның Маңғыстау облыстық филиалы пікір білдірді.

"Жаңаөзен Автоматты метеостанциясының мәліметінше, 3 шілдеде жергілікті уақыт бойынша шамамен 16:00 желдің екпіні секундына 20 метрге дейін күшейген. Шаң, тұман сынды атмосферлық құбылыстар байқалған, оның соңы бұршақ аралас нөсер жауынға ұласқан", - дейді синоптиктер.

Еске сала кетсек, бұған дейін еліміздің бес облысында аптап ыстыққа байланысты "қызыл" деңгей жарияланған еді.

Одан бөлек, синоптиктер қызыл" деңгейде орналасқан облыстарда дауылдық ескерту жариялады.

Мәселен Қызылорда облысында 3-5 шілде аралығында 45 градусқа дейін аптап ыстық пен өте жоғары өрт қаупі сақталады.

Маңғыстау облысында да 3-4 шілде күндіз ауа температурасы 40-41 градусқа көтеріліп, өте жоғары өрт қаупі сақталады.

Жалпы мамандардың болжамынша, шілде айы ыстық болады әрі жауын-шашын аз түседі.

Шілдеде батыста және солтүстік-батыста түнде ауа температурасы +22+30 градусқа дейін, күндіз +33+43 градусқа дейін көтеріледі. Солтүстікте, орталықта және шығыста түнде +15+23°С-қа дейін, күндіз +28+39°С-қа дейін жоғарлайды.

Ал оңтүстік және оңтүстік-шығыста түнде +18+27 градус, күндіз +35+43 дейін ыстық болады.