RU

Алматылықтардың азық-түлікке жұмсайтын шығыны былтырғыдан азайып кеткен

Азық-түлік
Көрнекі сурет: Pixabay

Finprom.kz агенттігі Қазақстан халқының тамаққа қанша ақша жұмсайтынын анықтады. 2021 жылдың бірінші тоқсанында орта есеппен алғанда жан басына шаққанда азық-түлікке 96,7 мың теңге ақша жұмсалған. Бұл көрсеткіш өткен жылмен салыстырғанда 4,6%-ға артық деп хабарлайды KAZNUR.KZ.

Агенттіктің зерттеуі бойынша азық-түлік сатып алу жөнінен Алматы қаласы тұрғындары көш бастап тұр. Тоқсандағы шығындарға назар салсақ, әрбір адам 127,2 мың теңгеге азық-түлік сатып алған. Десе де, бұл былтырмен салыстырғанда 4,2%-ға аз.

2021 жылдың бірінші тоқсанында қазақстандықтардың жан басына шаққанда жұмсаған шығыны 96,7 мың теңгеге тең болған. Бұл өткен жылмен салыстырғанда 4,6%-ға көп.

Павлодар (117,1 мың теңге, былтырмен салыстырғанда 18,1%-ға артық) мен Шығыс Қазақстан облысының (116,5 мың теңге, былтырмен салыстырғанда 5,3%-ға артық) тұрғындары да азық-түлікке өзге өңірлерге қарағанда көбірек ақша жұмсаған болып шықты.

Тамаққа жұмсалатын отбасылық бюджеттің көп бөлігі азық-түлік пен алкогольсіз сусындарға жұмсалады екен. Бұл мақсатта 90,2 мың теңге құртылады. Яғни, бір жыл бұрынғы көрсеткіштен 5,5%-ға артық. Темекі өнімдеріне 2,6 мың теңге, ал үйден тыс тамақтануға 2,4 мың теңге жұмсалады.

Сондай-ақ, алкогольді сусындарға жұмсалатын қаражат бірден 14,4%-ға азайған. Жан басына шаққанда алкогольді сусындарға әрбір адам 1,3 мың теңге жұмсаған.

Қаражаттың қомақты бөлігі нан мен жарма (14,3 мың теңге), сонымен бірге сүт өнімдеріне (9,6 мың теңге) кететіні белгілі болды.

Мақаланың түпнұсқасы: https://kaz.nur.kz/society/1921970-almatylyqtardyn-azyq-tulikke-zumsaityn-sygyny-byltyrgydan-azaiyp-ketken/