RU

Тұрғын үй бағасы арзандай ма: Вице-министр болжам жасады

Кілт
Көрнекі фото: pexels.com

Индустрия және инфрақұрылымдық даму бірінші вице-министрі Қайырбек Өскенбаев елімізде тұрғын үй бағасына қатысты өз болжамын ұсынды деп хабарлайды ҚазАқпарат.

"Біз үнемі баға болжамы бойынша мониторинг жүргізіп отырамыз. Биыл қаңтар айында жаңа тұрғын үйдің бағасы 3,8 пайызға өссе, қолданыстағы үйдің бағасы 7,2 пайызға артқан. Ал маусым айында жаңа үйдің бағасы 0,9 пайызды көрсетсе, қолданыстағы баспана бағасы 1,2 пайызды құрап отыр.

Айтар болсақ, Петропавл қаласында қаңтар-ақпан айларында қолданыстағы тұрғын үйдің бағасы 5,6 кейде 4,6 пайызға дейін өскені байқалды. Сәуір айында төмендеу байқалды яғни 2,4 пайызға төмендеді, қазір де осы баға сақталып тұр деуге болады", – деді Қайырбек Өскенбаев ОКҚ-де өткен баспасөз мәслихатында.

Оның айтуынша, елімізде жаз айларында тұрғын үй бағасының тұрақтануы бұған дейін де болжанды.

"Біздің болжам бойынша тұрғын үй бағасы маусым-шілде айларында тұрақтанды, бұған дейін болған баға өсімі зейнетақы жинағын баспана алуға рұқсат етілуімен байланысты. Бүгінде ол мәселе де бір ретке келді. Менің жеке болжамым бойынша алдағы қыркүйек айында тұрғын үй бағасының төмендеуі күтіледі", – дейді ол.

Бұған дейін сарапшылар шарықтаған пәтер құнын түсірудің жолдарын атаған болатын.

Сондай-ақ, БЖЗҚ-дан алынатын сомалар айтарлықтай төмендеп, ендігі нарыққа айтарлықтай әсер ете алмайтынын алға тартқан болатын.

Мақаланың түпнұсқасы: https://kaz.nur.kz/society/1922142-turgyn-ui-bagasy-arzandai-ma-vice-ministr-bolzam-zasady/