RU

Бөтелкемен ұрған: Талдықорғанда ер адамның әрекеті жұртты шошытты

Полицей
Көрнекі фото: piqsels.com

Талдықорғанда қала орталығында өтіп бара жатқан қызға негізсіз шабуыл жасап, сыра бөтелкесімен ұрған жас жігіт іздестіріліп жатыр деп хабарлайды Sputnik Қазақстан.

Ерсі әрекетімен қала тұрғындарын шошытқан қылмыскердің суреті әлеуметтік желіде тарап жатыр. Жазба авторы жігіттің "Атамекен" ойын-сауық орталығының алдында қызды ұрып, оқиға орнынан қашып кеткенін атап өтті.

Полиция бұл ақпаратты растап, оқиғаның 15 шілде күні сағат 23:00 шамасында болғанын айтты.

"Қазір қалалық полиция қызметкерлері күдіктіні анықтау және ұстау бойынша шаралар жүргізуде. Қылмыстық кодекстің 293-бабы, 1-бөлімі "Бұзақылық" бойынша қылмыстық іс қозғалды", - деп хабарлады Алматы облысы полиция департаментінің баспасөз қызметі.

25 жастағы қыздың ауыр жарақат алмағаны хабарланды. Дәрігерлер тексергеннен кейін ол амбулаториялық емделуге жіберілді.

Мақаланың түпнұсқасы: https://kaz.nur.kz/society/1922828-botelkemen-urgan-taldyqorganda-er-adamnyn-areketi-zurtty-sosytty/